Վերջին տարիներու Լիբանանի տնտեսական ճգնաժամը բնականաբար իր ազդեցութիւնը ձգեց նաև ուսումնական համակարգին վրայ։ Դպրոցները անմասն չմնացին տարբեր տեսակի տագնապներէ ու դիմագրաւեցին բազմատեսակ դժուարութիւններ։ Շնորհիւ հայ եկեղեցւոյ, գաղութի կազմակերպութիւններուն, բարերարներու, տնօրէնութիւններու մեծ ջանքերուն Լիբանանի հայկական դպրոցները շարունակեցին ու կը շարունակեն իրենց գործունէութիւնը։
Ի հեճուկս բոլոր մարտահրաւէրներուն՝ արդեն 84 տարի է ազգապահպանման իր գոյերթը կը շարունակէ նաև Պուրճ Համուտի մէջ գտնուող Հայ Կաթողիկէ Մեսրոպեան Բարձրագոյն Վարժարանը:
Գրեգուար Գալուստ (Հայ կաթողիկե Մեսրոպյան բարձրագոյն վարժարանի տնօրեն) - Այսօր Մեսրոպեան վարժարանը իր աւելի քան 1129 աշակերտ աշակերտուհիներով և անձնակազմը որ կը պարունակէ 138 անհատներէ այս մեծ ընտանիքը կը շարունակէ իր գոյերթը միշտ ու միշտ տեսլական ունենալով , որ ջամբելու լաւագոյն և ամենաարդի դաստիարակութիւնը մատղաշ հայ զաւակներուն։ Մենք կը մնանք կառչած այս սկզբունքին և ի հեճուկս բոլոր դժուարութիւններուն վճռած ենք շարունակել և միշտ զարգանալով զարգացնել նաև մեր շրջապատը։
Մեսրոպեանը կ'ընդգրկէ մանկամսուրէն մինչև լիբանանեան պաքալորէայի աւարտական դասարաններու բոլոր բաժինները։ Լիբանանահայ աշակերտը պարտի հետևիլ լիբանանեան կրթական ծրագրին։ Դպրոցը առանձնայատուկ ուշադրութիւն կը դարձնէ լեզուներու ուսուցմանը:
Սալբի Մուղալյան (նախակրթարանի պատասխանատու) - Ուրեմն Մեսրոպեանի կեդրոնացումը հայերէն դասաւանդութեան կողքին նաև կը կեդրոնանայ տարբեր լեզուներու վրայ ինչպէս հայերէնի կողքին արաբերէնը , ֆրանսերէնը հիմնական ըսենք օտար լեզու և չորրորդ լեզու մանկապարտէզէն սկսեալ անգլերէնը։
Լեզուներու ուսուցման հարցին մէջ վարժարանն ունի հմուտ մասնագէտներ և ծրագիր , նկատի ունենալով , որ մի քանի լեզուի լաւ իմացութիւնը յաջողութեան հեռանկարներ կը ստեղծէ շրջանաւարտներուն համար:
Սալբի Մուղալյան - Մեր հիմնական լեզուն աբաբերէնն է և ֆրանսերէնն է, բայց մեր աշակերտները այդքան անգլերէնին կը տիրապետեն որ իրենց համար այլևս ոչ մէկ մարտահրաւէր կը մնայ որ համալսարանները, բոլոր համալսարանները իրենց համար համալսարաններուն դռները բաց են նորեն կ'ըսեմ ըլլայ Լիբանանի մէջ և ըլլայ տարբեր երկիրներու մէջ։
Այդ շրջանաւարտներէն շատեր բարձր գնահատանքի արժանացած մասնագէտներ են գործի զանազան ասպարէզներու մէջ ինչպէս նաև գործունեայ անդամներ ` հայկական ընկերութեան մէջ։ Աշակերտներու բազմակողմանի զարգացման համար վարժարանը սերտօրէն կը համագործակցի տեղական և միջազգային կազմակերպութիւններու հետ։
Վարժարանի մանկավարժները կը շեշտեն ,որ առանց հայ դպրոցի` հայը կը կորսուի սփիւռքի ափերուն։
Սոսե Գասպարյան (Գրիգորյան մանկապարտեզի հայերենի ուսուցչուհի) - Հայ դպրոցը հայ մանուկին երկրորդ տունն է , Մեսրոպեանին մէջ աշակերտները կը ստանան հայեցի դաստիարակութիւն, մենք կ'աշխատինք և կը զարգանանք յանուն աշակերտներուն լաւագոյն կրթութեան և դաստիարակութեան վրայ։
Հայ Կաթողիկէ Մեսրոպեան Բարձրագոյն Վարժարանը կը զարգացնէ սաներու անհատականութիւնը, հոգեմտաւոր արժէքները, կ'օգնէ ինքնակայացման, կը պատրաստէ օրինապահ քաղաքացին և հայկական համայնքի գործունեայ անդամները։
Հեղինակ` Փաթիլ Մկրտիչեան
