Շահագործման հանձնելուց հետո նորակառույց բազմաբնակարան շենքերի արդյունավետ կառավարման, պահպանման համար Քաղաքաշինության կոմիտեն առաջարկում է փոփոխել և լրացնել «Բազմաբնակարան շենքի կառավարման մասին» օրենքը: Կոմիտեում վստահեցնում են, որ օրենքի վերանայման անհրաժեշտությունն առաջացել է՝ պայմանավորված շուկայական նոր հարաբերություններով, նորակառույցում բնակարանի գնման իրավունք ձեռք բերելու՝ վերջին տարիների աճի միտումներով:
Տանյա Արզումանյան (ՀՀ քաղաքաշինության կոմիտեի բնակարանային ֆոնդի կառավարման և կոմունալ ենթակառուցվածքների վարչության պետ) - Հաճախ ենք հանդիպում դեպքերի, երբ այդ գնման իրավունքից մինչև շենքի շահագործման հանձնվելու փուլը տեղի են ունենում իրավունքների ոտնահարումներ: Հարցը բազմիցս բարձրաձայնվել է տարբեր սեփականատերերի կողմից, այդ թվում՝ բարեխիղճ կառուցապատողների կողմից, որ անբերախիղճ կառուցապատողների կողմից սեփականատերերի իրավունքը չարաշահվում է:
Առանձնացվել է 5 հիմնական խնդիր: Բնակարանային ֆոնդի կառավարման և կոմունալ ենթակառուցվածքների վարչության պետը գործող օրենքի էական բաց է համարում շահագործման հանձնելուց անմիջապես հետո նորակառույցի կառավարման հարցերի լուծման մեխանիզմների բացակայությունը: Նախագծով առաջարկվում է՝ կառուցապատողին վերապահել սեփականատերերի անունից կառավարման մարմին ձևավորելու իրավունք՝ մինչև որ սեփականատերերն իրենք դա կանեն:
Տանյա Արզումանյան - Երբ ձևավորվեց կառավարման մարմին, ունենք խնդիր, որ կառուցապատողները շենքին, կառավարման մարմնին չեն հանձնում շենքի վերաբերող փաստաթղթերը: Խոսքը նախագծային կազմի մասին է, այն փաստաթղթերի, որոնք թույլ կտան շենքի կառավարումը ավելի արդյունավետ դարձնել: Ասենք՝ բնակիչը կարող է մի տեղ մեխ խփել, և պարզվի՝ հոսանքի գիծ է, որովհետև որևէ մեկը կարող է տեղեկություն չունենալ՝ որտեղով է անցնում հոսանքի, ջրի գիծը:
Նախագծային լուծումների մասին տեղեկացվածությունն, ըստ Արզումանյանի, կնպաստի շենքի արդյունավետ կառավարմանն ու պահպանմանը, զերծ կպահի հնարավոր վթարային իրավիճակներից: Կառավարման մարմին ձևավորելուց հետո 5 աշխատանքային օրվա ընթացքում կառուցապատողը կպարտավորվի բոլոր փաստաթղթերը հանձնել այդ մարմնին: Նախագծով առաջարկվել է կարգավորել նաև ընդհանուր բաժնային սեփականություն հանդիսացող տարածքների տնօրինման խնդիրը: Դրանց առնչությամբ ցանկացած գործողություն պետք է կատարվի միայն շենքից գնման կամ ձեռքբերման իրավունք ունեցող անձանց համաձայնությամբ:
Տանյա Արզումանյան - Սահմանում ենք շրջանակը, որ որևէ դեպքում, անգամ սեփականատերերի համաձայնությամբ չի կարող օտարվել: Խնդիրը ծագել է, երբ շենքի տանիքային հարկում, որտեղ վերելակի սպասարկման, շահագործման ամբողջ մեխանզիմը, կենտրոնացված ձեռուցման համակարգի կամ նկուղի պոմպակայանը: Տանիքի տարածքը գրանցում են որպես բաց պատշգամբ և օտարում են, ստացվում է, որ ամբողջ շենքի սպասարկման նախատեսված բաժնային գույքը դառնում է անհասանելի: Տանիքի տերը կարող է դուռը փակել, և քաղաքացին վթարի դեպքում չկարողանա մտնել:
Փաստաթուղթ չփոխանցելուց մինչև օտարման դեպքեր. վարչական պատասխանատվության չափը կարող է լինել 500 հազարից մինչև 5 միլիոն դրամ: Բայց միաժամանակ ամրագրվել է՝ ցանկացած դեպքում նման պահանջի խախտմամբ կնքված գործարքը կճանաչվի անվավեր: Նպատակն է՝ պաշտպանել գնման իրավունք ձեռք բերած անձանց իրավունքները, զուգահեռ խրախուսել բարեխիղճ կառուցապատողներին: Քննարկումներից հետո նախագիծը ներկայացվել է վարչապետի աշխատակազմ: Աշխատակազմի առաջարկով փաթեթը համալրվել է «Վարչական իրավախախտումների վերաբերյալ օրենսգրքում լրացումներ կատարելու մասին» օրինագծով և կրկին ուղարկվել շահագրգիռ մարմինների քննարկմանը:
