Մեկնարկել է սահմանամերձ գյուղերում պետական աջակցությամբ սեփական տուն կառուցելու ծրագիրը, որը հնարավորություն կտա շահառուներին պետական աջակցությամբ կառուցելու անհատական բնակելի տուն սահմանամերձ 80 բնակավայրերում:
Ըստ ՀՀ ԱՍՀՆ կառուցվածքային ստորաբաժանումների առանձին գործառույթները համակարգող խորհրդական Գայանե Ղարագյոզյանի՝ ծրագրի նպատակը սահմանամերձ գյուղերի համաչափ և կայուն զարգացումն է, սակայն հատկապես անապահով ընտանիքների, ցածր եկամուտ ունեցողների բնակարանային խնդրի լուծումը:
«Ծրագրի շահառու կարող են դառնալ այն ամուսինները, որոնք ունեն ՔԿԱԳ-ում գրանցված ամուսնություն, որոնք ունեն ցանկություն՝ կառուցելու տուն սահմանամերձ բնակավայրում, ունեն հողամաս կամ կիսակառույց շինություն համապատասխան թույլտվությամբ նշված գյուղական բնակավայրում և ունեն դրական վարկային պատմություն: Ամուսիններից գոնե մեկը պետք է ունենա ՀՀ քաղաքացիություն»,- ասաց Ղարագյոզյանը:
Ակնկալվում է, որ մինչև 2023-ի ավարտն առնվազն 300 ընտանիք սահմանամերձ բնակավայրերում կկառուցի իր տունը, իսկ մինչև 2024-ի ավարտը՝ շուրջ 550 ընտանիք: Այն պետական աջակցություն հիփոթեքային վարկավորմամբ է տրամադրվում, ամենամսյա վճարներով:
«Պետության կողմից սուբսիդավորվող չափը վարկի մայր գումարի գծով կազմում է մինչև 16 միլիոն դրամ և դրա նկատմամբ հաշվեգրվող՝ մինչև 13 տոկոս տոկոսագումար: Այսինքն՝ եթե շահառուն բանկից ստանում է 16 միլիոն դրամ վարկ 13 տոկոսով, 10 տարի մարման ժամկետով, ինքը որևէ պարտավորություն տվյալ վարկի շրջանակում չունի, ամբողջն իրականացնում է պետությունը: Եթե վարկի չափն ավելին է, տարբերության մասով ամսական վճարումներն իրականացնում է իր միջոցներով»,- ասաց Ղարագյոզյանը:
Ծրագիրն արդեն իսկ ունի 9 շահառու: Ընտրված բնակավայրը Սյունիքի մարզի Տեղ գյուղում է, մյուսը՝ Տավուշի մարզում՝ Ոսկեվանում:
Հեղինակ՝ Լուսինե Մուրադյան
