Պետական-իրավական հարցերի մշտական հանձնաժողովի այսօրվա նիստում քննարկվել է «Հանրային ծառայության մասին» օրենքում լրացում կատարելու առաջարկը:
Կառավարության անդամն իր լիազորությունները ստանձնում և դադարեցնում է ՀՀ նախագահի հրամանագրի հրապարակման պահից: Թեև նշված մասերով նախատեսված է` ո՞ր պահից է Կառավարության անդամը ստանձնում և դադարեցնում իր լիազորությունները, սակայն պարզ է դառնում, որ խոսքը վերաբերվում է բոլոր այն դեպքերին, երբ Կառավարության անդամը նշանակվում և ազատվում է ՀՀ նախագահի հրամանագրով: Այս օրենքով սահմանված չեն վարչապետի որոշմամբ հանրային պաշտոնին նշանակված և ազատված անձի լիազորությունների ստանձման և դադարեցման պահը կանոնակարգող հարաբերությունները: Ելնելով վերոնշյալից` օրենքը լրացվել է նոր կետով, ըստ որի` հանրային պաշտոնում նշանակելու, հանրային պաշտոնից ազատելու վերաբերյալ վարչապետի որոշումներն ուժի մեջ են մտնում հրապարակման պահից, եթե այդ որոշումներով ավելի ուշ ժամկետ նախատեսված չէ. ասել է ՀՀ արդարադատության նախարարի տեղակալ Արմենուհի Հարությունյանն ԱԺ պետական-իրավական հարցերի մշտական հանձնաժողովի նիստում ««Հանրային ծառայության մասին» օրենքում լրացում կատարելու մասին» օրենքի նախագծի քննարկման ժամանակ:
Հարակից զեկուցող, ԱԺ պատգամավոր Կարեն Սարուխանյանն իր ելույթում նշել է, որ առաջարկվող լրացումը կրում է տեխնիկական բնույթ: Նա առաջարկել է հանձնաժողովի անդամներին կողմ քվեարկել օրենքի նախագծին:
Առաջին ընթերցմամբ քննարկվող նախագծին հանձնաժողովը տվել է դրական եզրակացություն:
