ԱՄՆ ԿՀՎ ղեկավար Ուիլյամ Բերնսը հայտարարել է, որ ՌԴ նախագահ Վլադիմիր Պուտինը լուրջ չի վերաբերվում ուկրաինական հակամարտության բանակցություններին։ Այսպես է նա գնահատել Ռուսաստանի ղեկավարի պատրաստակամությունը բանակցային գործընթացին, նրա խոսքը ներկայացրել է CNN-ը։
Ամերիկյան հետախուզության ղեկավարի կարծիքով՝ Ուկրաինայի զինված ուժերի հաջողությունները մարտի դաշտում կարող են դիվանագիտական կարգավորման հեռանկարներ ստեղծել։ Նա ընդգծել է, որ ռուսական կողմը կրկնապատկել է իր ռազմական ջանքերը, միաժամանակ հավելել է, որ Կիևը Վաշինգտոնի աջակցությամբ կարող է հակահարված տալ Մոսկվային։
Ավելի վաղ հաղորդվել էր, որ համացանցում հայտնված Պենտագոնի գաղտնի փաստաթղթերում նկարագրված է ուկրաինական հակամարտությանը Չինաստանի հնարավոր միջամտության սցենարը: Փաստաթղթերից մեկում ասվում է, որ ուկրաինական հարձակումը Ռուսաստանի տարածքի վրա ՆԱՏՕ-ի զենքի կիրառմամբ կարող է Պեկինին ներքաշել հակամարտության մեջ:
