Վրաստանի նախագահ Սալոմե Զուրաբիշվիլին մտավախություն է հայտնել, որ չորս բարձրաստիճան դատավորների նկատմամբ ԱՄՆ պատժամիջոցները կարող են խանգարել երկրին ստանալ Եվրամիության անդամի թեկնածուի կարգավիճակ:
«Ցավում եմ, որ այս որոշմամբ մեր երկիրը հայտնվում է պատժամիջոցների տակ գտնվող այլ երկրների ցանկում, հատկապես այն դեպքում, երբ Վրաստանը եվրոպական գործընկերներից կարևորագույն որոշում է ակնկալում՝ թեկնածուի կարգավիճակի տրամադրում։ Մտավախություն ունեմ, որ ԱՄՆ-ի որոշումը Եվրոպայում որպես բացասական ազդանշան կընկալվի»,- նշել է Զուրաբիշվիլին ԱՄՆ դեսպան Քելլի Դեգնանի հետ հանդիպումից հետո կայացած ճեպազրույցի ժամանակ։
Նրա խոսքով՝ անհրաժեշտ է գործուն քայլեր ձեռնարկել, դատական համակարգում կոռուպցիայի հնարավոր փաստերի քննության կամ Արդարադատության բարձրագույն խորհրդի կազմի վերանայման ուղղությամբ:
Զուրաբիշվիլու կարծիքով՝ թեև ԱՄՆ պատժամիջոցները վերաբերում են ընդամենը չորս մարդու, սակայն վնասում են Վրաստանի հեղինակությանը:
Ավելի վաղ Վրաստանի ԱԳ նախարար Իլիա Դարչիաշվիլին ԱՄՆ պետքարտուղար Էնթոնի Բլինքենին ուղղված նամակում նշել է, որ պատժամիջոցները կվնասեն երկու երկրների բարեկամական հարաբերությունները: Նա ԱՄՆ-ից պահանջել էր ապացույցներ, որոնք կփաստեին վրացի դատավորների մեղավորությունը կոռուպցիայի համար:
ԱՄՆ պետքարտուղարության խոսնակի առաջին տեղակալ Վեդանտ Պատելը նշել էր, որ Վաշինգտոնը համոզված է իր տեղեկության արժանահավատության հարցում:
«Մենք հավաստի տեղեկություններ ունենք, որ այդ անձինք ներգրավված են եղել լուրջ կոռուպցիայի մեջ՝ կապված իրենց ներկա և նախկին պաշտոնների հետ։ Այս կոռուպցիոն գործունեությունը խաթարում է օրենքի գերակայությունը Վրաստանում։ Այն խաթարում է նաև երկրում ժողովրդավարական գործընթացները»,- ասել է Պատելը:
