Սպորտային մարմնամարզության Հայաստանի երիտասարդական հավաքականը Թուրքիայում մասնակցել է աշխարհի երկրորդ առաջնությանը և նվաճել 2 ոսկե ու1 արծաթե մեդալ: Թիմային հաշվարկում Հայաստանի հավաքականը զբաղեցրել է 4-րդ հորիզոնականը:
.jpg)
Հայաստանի հավաքականի կազմում աշխարհի երիտասարդական առաջնության կրկնակի հաղթող է դարձել Համլետ Մանուկյանը՝ նժույգթափերի և օղակների վարժությունում: Նժույգթափերի վարժության եզրափակչում Համլետ Մանուկյանը հավաքել է 14.633 միավոր և զբաղեցրել առաջին հորիզոնականը: Այս վարժության արդյունքներով արծաթե մեդալին արժանացել է Հայաստանի մյուս ներկայացուցիչ Մամիկոն Խաչատրյանը՝ 14.100 միավորով:
.jpg)
Մանուկյանն առաջին հորիզոնականն է զբաղեցրել նաև օղակների վարժությունում՝ եզրափակչում հավաքելով 13.633 միավոր:
Հաղթանակից հետո 15-ամյա Համլետ Մանուկյանը նշել է՝ իր համար մեծ պատիվ է Թուրքիայում ՀՀ պետական օրհներգը հնչեցնելը. «Շատ լավ զգացողություններ ունեմ: Շատ հպարտ եմ ու շատ ուրախ, որ կարողացա Թուրքիայում հնչեցնել հայոց հիմնը, և կարողացանք ես ու իմ ընկերը մեր դրոշը բարձրացնել: Մյուս ընկերոջս համար նույնպես շատ ուրախ եմ: Ցավոք սրտի, Էրիկին փոքր-ինչ պակասեց մեդալակիր դառնալու համար: Այս աշխարհի առաջնությունից հետո պետք է ավելի բարդ վարժություններ կատարենք գործիքների վրա»:
.jpg)
Հայաստանի մյուս ներկայացուցիչ Էրիկ Բաղդասարյանը 4-րդ տեղն է զբաղեցրել օղակների վարժությունում և զուգափայտերում՝ չնչին միավորով զիջելով մեդալակիր մարզիկներին: Հայաստանի ներկայացուցիչները հանդես են եկել նաև բազմամարտի եզրափակչում: Համլետ Մանուկյանը 78.666 միավորով գրավել է 6-րդ, իսկ Էրիկ Բաղդասարյանը՝ 12-րդ տեղը:
.jpg)
Հայաստանի մեծահասակների հավաքականի գլխավոր մարզիչ Հակոբ Սերոբյանը, որն աշխարհի երիտասարդական առաջնությունում հանդես էր գալիս մրցավարական թիմում, նշել է՝ մեդալները սպասելի էին. «Անսպասելի էր թիմային շատ բարձր արդյունքը․ 4-րդ տեղը աշխարհում շատ բարձր արդյունք է, իսկ որ մեդալ պիտի նվաճեինք, սպասում էինք։ Ամենաշատը ուրախ եմ, որ ցույց են տալիս՝ մենք ունենք ապագա»:
Հայաստանի հավաքականի մրցելույթները մեկնաբանել է նաև Հայաստանի մարմնամարզության ֆեդերացիայի նախագահ Գագիկ Վանոյանը. «Արդյունքները, կարծում եմ, սպասվածից լավ են։ Մարմնամարզության դեպքում միշտ մեդալների ենք սպասում, բայց այստեղ պետք է ուշադրություն դարձնել այն հանգամանքին, որ աշխարհի ուժեղագույնների մեջ թիմային հաշվարկում 4-րդ հորիզոնականը զբաղեցնելն արդեն քայլ է։ Դա արդեն նշանակում է, որ մեր երիտասարդները արժանի փոխարինողներ են մեծահասակներին։ Ընդհանուր ամփոփելով՝ կարող եմ ասել, որ շնորհիվ մեր մարզիչների՝ փայլուն աշխատանք է կատարված, բայց երբեք չպետք է բավարարվենք ձեռք բերածով, պետք է շարունակենք աշխատել»:
Նշենք՝ աշխարհի երիտասարդական առաջնությունում Հայաստանն առաջին անգամ ներկայացուցիչ է ունեցել աղջիկների մրցապայքարում: 14-ամյա Մարիետա Բուչախչյանը հանդես է եկել բոլոր չորս գործիքների վրա, վաստակել է 40,065 միավոր և գրավել 108-րդ տեղը:
Հայաստանի հավաքականները հանդես են եկել մարզիչներ Հայկ Նազարյանի և Քնարիկ Բրսոյանի գլխավորությամբ:
Նախապատրաստվելով աշխարհի առաջնությանը՝ երիտասարդ հայ մարմնամարզիկները մարտի 11-25-ն ուսումնամարզական հավաք են անցկացրել Վրաստանի մայրաքաղաք Թբիլիսիում:
Նշենք՝ Անթալիայում ապրիլի 11-16-ը կանցկացվի նաև մեծահասակների Եվրոպայի առաջնությունը, որին Հայաստանը կմասնակցի 5 մարզիկով: Հայաստանի հավաքականի կազմում մրցավայր կմեկնեն Հարություն Մերդինյանը, Արթուր Դավթյանը, Վահագն Դավթյանը, Արթուր Ավետիսյանը և Գագիկ Խաչիկյանը:
Սպորտային մարմնամարզության մեծահասակների հավաքականը մարտի 25-ից ապրիլի 8-ն ուսումնամարզական հավաք է անցկացնում Թբիլիսիում: Նրանք Եվրոպայի առաջնությունում հանդես կգան մարզիչներ Սոս Սարգսյանի և Հայկ Նազարյանի գլխավորությամբ: Եվրոպայի առաջնության մրցավարական կազմում ընդգրկված կլինեն նաև Հակոբ Սերոբյանն ու Արթուր Գյուրջինյանը:
