Սպիտակ տան Ազգային Անվտանգության խորհրդի ռազմավարական հաղորդակցությունների համակարգող Ջոն Քիրբին ԱՄՆ քաղաքացիներին կոչ է արել լքել Ռուսաստանը՝ անկախ ուղևորության նպատակից և զբաղմունքից:
Քիրբիի խոսքով՝ այս պահին ԱՄՆ քաղաքացիների համար Ռուսաստանում գտնվելու ժամանակը չէ։ «Ռուսաստանը ձեզ համար լավագույն տեղը չէ, նույնիսկ եթե դուք լրագրող եք»,- ասել է Քիրբին CNN-ի հետ հարցազրույցում:
Ավելի վաղ ԱՄՆ նախագահ Ջո Բայդենը դիմել էր Ռուսաստանի իշխանություններին՝ կոչ անելով ազատ արձակել The Wall Street Journal-ի լրագրող Էվան Գերշկովիչին, որը մարտի 30-ին ձերբակալվել էր Ռուսաստանում լրտեսության մեղադրանքով:
Ռուսական կողմը պնդում է, որ նա «գաղտնի տեղեկություններ է հավաքել ռուսական ռազմարդյունաբերական ձեռնարկություններից մեկի մասին»։ Լրագրողին սպառնում է մինչև 20 տարվա ազատազրկում։
Լրատվամիջոցները, վկայակոչելով իրենց աղբյուրները, գրում են, որ ամերիկացի լրագրողն իրականում Եկատերինբուրգ էր մեկնել՝ հետաքննելու, թե ինչպես է «Վագներ» մասնավոր ընկերությունը հավաքագրում տեղի բնակիչներին Ուկրաինայում կռվելու համար:
