Հանրապետական և Դեմոկրատական կուսակցությունների ամերիկացի սենատորները Պենտագոնից պահանջել են F-16 կործանիչներ ուղարկել Ուկրաինա։ Այդ մասին գրում է Politico-ն։
Ամերիկյան երկկուսակցական խումբը նամակ է ուղարկել պաշտպանության նախարար Լլոյդ Օսթինին՝ կոչ անելով ուսումնասիրել Կիև ինքնաթիռներ ուղարկելու հնարավորությունը։ Քաղաքական գործիչների կարծիքով՝ Ռուսաստանի և Ուկրաինայի միջև հակամարտությունն այժմ «կրիտիկական փուլում է», և կործանիչները կարող են առավելություն տալ ուկրաինական կողմին։ «Այս հնարավորությունը կարող է փոխել իրադրությունը մարտի դաշտում»,- ասվում է նամակում:
Սենատորներն Օսթինին խնդրել են մինչև շաբաթվա վերջ իրենց ներկայացնել մի շարք գործոնների գնահատականները, որոնք անհրաժեշտ են F-16-ը հաջողությամբ Ուկրաինա տեղափոխելու համար: Քաղաքական գործիչներին հետաքրքրում է, թե ինչ ազդեցություն կունենան F-16-ները հակամարտության վրա, և որքան արագ ուկրաինացի օդաչուները կկարողանան սովորել թռչել այդ ինքնաթիռներով:
