Երևանի պետական համալսարանում անցկացվել է Քաղաքացիական պաշտպանության միջազգային օրվան նվիրված ցուցադրական հատուկ տակտիկական ուսումնավարժություն:
Մարտի 1-ին ՀՀ ՆԳՆ Փրկարար ծառայությունը Երևան քաղաքի Ալեք Մանուկյան 1 հասցեում գտնվող Երևանի պետական համալսարանում անցկացրեց «Քաղաքացիական պաշտպանության միջոցառումների կազմակերպումը և իրականացումը» թեմայով ցուցադրական հատուկ տակտիկական ուսումնավարժություն։
Ուսումնավարժության նպատակն էր ստուգել արձագանքող ուժերի պատրաստվածությունը, ինչպես նաև կատարելագործել գործնական հմտությունները, ԵՊՀ ՔՊ կազմավորումների, ինչպես նաև այլ օպերատիվ ծառայությունների փոխհամագործակցությունը որոնողափրկարարական և անհետաձգելի վթարավերականգնողական աշխատանքների իրականացման գործում:
Ուսումնավարժությանը մասնակցում էին ՓԾ փրկարար ուժերի վարչության հատուկ նշանակության փրկարարական աշխատանքների իրականացման կենտրոնի կինոլոգիական խումբը, բժշկական ապահովման վարչության, հոգեբանական աջակցության բաժնի, քաղաքացիական պաշտպանության վարչության ՔՊ ուժերի հավաքական կենտրոնի ինժեներասակրավորական, ԵՓՎ հրդեհաշիջման և փրկարարական աշխատանքների կազմակերպման բաժնի հերթապահ խմբերը, ԵՓՎ հրշեջ-փրկարարական ջոկատներից 6 մարտական հաշվարկ, 1 ավտոսանդուղք, 1 գազածխապաշտպան ծառայության ավտոմենքենա։
Ուսումնավարժությանը ներգրավված էին նաև ՀՀ ՆԳՆ ոստիկանության պարեկային ծառայության կարգախմբեր, «Շտապ բուժօգնության» բրիգադներ, Հայկական Կարմիր խաչի ընկերության արագ արձագանքման թիմը, «Երևան գազ» ԳԳՄ-ի, «ՀԷՑ» և «Վեոլիա ջուր» ՓԲԸ-ների վթարային խմբերը, ինչպես նաև ԵՊՀ ՔՊ կազմավորումները:
Ըստ սցենարի՝ թշնամու օդուժի կողմից ռմբակոծվել է համալսարանի մասնաշենքերը, ինչի հետևանքով շենքը ստացել է զգալի վնասներ, կան փլուզումներ, վիրավորներ, առաջացել են հրդեհի օջախներ։
Գործարկվել է համալսարանի ազդարարման համակարգը: «Օդային տագնապ» ազդանշանից հետո համալսարանի ղեկավար կազմն անմիջապես կազմակերպեց աշխատակիցների և ուսանողների տարհանումը:
Մինչ փրկարարական ուժերի ժամանումը համալսարանի կազմավորումների ուժերով իրականացվեցին ընդհանուր հետախուզության, հրդեհաշիջման, փրկարարական և առաջին օգնության ցուցաբերման միջոցառումներ:
Դեպքի վայր ժամանած ՆԳՆ ՓԾ ստորաբաժանումերն իրականացրեցին հետախուզություն և բացազատում: Ստեղծվեց փրկարարական աշխատանքների ղեկավարման օպերատիվ շտաբ:
Տարբեր տեղամասերում իրականացվեցին հրդեհաշիջման, ինչպես նաև արգելափակված քաղաքացիների ու տուժածների տարհանման աշխատանքներ՝ ավտոսանդուղքի, ալպինիստական պարանների և պատգարակի կիրառմամբ:
Միջոցառմանը հետևում էին ՆԳՆ ՓԾ տնօրեն,ՆԳ նախարարի տեղակալ, փ/ծ գնդապետ Կամո Ցուցուլյանը և Երևանի քաղաքապետ Հրաչյա Սարգսյանը։
Ավարտին ՓԾ տնօրենը, ամփոփելով արդյունքները, շնորհակալություն հայտնեց ուսումնավարժանքի մասնակիցներին՝ դրական գնահատելով կատարված աշխատանքները։
