Հայ հրաձիգները Լեհաստանում ընթացող ուսումնամարզական հավաքի շրջանակում մասնակցել են Բելոստոկ քաղաքում անցկացված բաց առաջնությանը, որում 2 ոսկե, 3 արծաթե և 1 բրոնզե մեդալ են նվաճել:
Առաջնության հաղթողներ են դարձել Էլմիրա Կարապետյանը, Զավեն Իգիթյանը, արծաթե մեդալների արժանացել են Վրեժ Թորոսյանը, Բենիկ Խլղաթյանը և Զավեն Իգիթյանը, իսկ բրոնզե մեդալ է նվաճել Գագիկ Նիկողոսյանը:
Էլմիրա Կարապետյանը ոսկե մեդալ է նվաճել օդամղիչ ատրճանակ մրցաձևում: Նույն մրցաձևում Զավեն Իգիթյանն արժանացել է ոսկե և արծաթե մեդալների, իսկ Բենիկ Խլղաթյանը զբաղեցրել է երկրորդ հորիզոնականը: Հրաձիգներ Վրեժ Թորոսյանն ու Գագիկ Նիկողոսյանը, համապատասխանաբար, արծաթե և բրոնզե մեդալներ են նվաճել «օդամղիչ հրացան» մրցաձևում:
Հայաստանի հավաքականի կազմում ընդգրկված են եղել նաև Գոռ Մանուչարյանը, Գրիգոր Պողոսյանը և Արմեն Գևորգյանը:
Հրաձգության հավաքական թիմը փետրվարի 17-ից ուսումնամարզական հավաք է անցկացնում Լեհաստանում՝ նախապատրաստվելով Էստոնիայի մայրաքաղաք Տալլինում մարտի 5-12-ը կայանալիք Եվրոպայի առաջնությանը:
