Փետրվարի 21-ին Վրաստանի մայրաքաղաք Թբիլիսիում տարերային և տեխնածին աղետների կանխարգելում, պատրաստվածություն և արձագանքում Արևելյան գործընկերության երկրներում (PPRD East 3) ծրագրի շրջանակներում տեղի է ունեցել Ղեկավար հանձանաժողովի 3-րդ նիստը, որին ներկա էին մասնակիցներ գործընկեր երկրներից, կոնսորցիումից, շահագրգիռ կողմերից և ԵՄ-ից։ Նիստին մասնակցել է նաև ՀՀ ՆԳՆ ՓԾ տնօրենի տեղակալ փ/ծ գնդապետ Տիգրան Պետրոսյանի գլխավորած պատվիրակությունը:
Հանդիպումն անցկացվում էր հիբրիդային ձևաչափով, որի ընթացքում ներկայացվեց 2021-2022 թվականների արդյունքների, փորձի և առաջիկա անելիքների վրա հիմնված տեխնիկական աշխատանքների իրականացման միջանկյալ հաշվետվությունը:
Գործընկեր երկրները ներկայացրեցին PPRD East 3-ի ծրագրի գործողությունների արդյունքում ձեռք բերված փորձը. բարձրացված հարցերի շրջանակներում առանձնահատուկ տեղ հատկացվեց վերապատրաստումներին և դրանց արդյունքներին, ինչպիսիք են՝ գիտելիքների փոխանակումը, այլ երկրների հետ համագործակցությունը և աղետների ռիսկի գնահատման ազգային մեթոդաբանության մշակումը:
Փետրվարի 22-23-ը տեղի է ունեցել միջնաժամկետ պլանավորման համաժողովը։ Միջնաժամկետ պլանավորման համաժողովի նպատակն էր վերջնական որոշումներ կայացնել հունիսին նախատեսվող լայնամասշտաբ վարժանքի սցենարի, մասնակից թիմերի կազմի և վարժանքի վերահսկման ընթացակարգերի վերաբերյալ: Քննարկվեցին նաև Վրաստանի կողմից տրամադրվող հյուրընկալող երկրի աջակցության մանրամասները, ներառյալ՝ ժամանող միջազգային թիմերի համար սահուն մաքսային ընթացակարգերը:
Նախատեսվող լայնամասշտաբ վարժանքը բացառիկ հնարավորություն կտա փորձարկելու ինչպես ազգային, այնպես էլ տարածաշրջանային կարողությունները՝ աղետների ռիսկի կառավարման ոլորտում։ Նախատեսվում է վարժանքի ընթացքում փորձարկել նաև վաղ ազդարարման առցանց տեղեկատվական հարթակը, ինչի միջոցով հնարավոր կլինի կանխատեսել ռիսկերը։
