Թուրքիայի արտաքին գործերի նախարար Մևլութ Չավուշօղլուն և ԱՄՆ պետքարտուղար Էնթոնի Բլինքենը երկուշաբթի Անկարայում բանակցություններ են վարել։
Բլինքենի՝ Թուրքիա կատարած առաջին այցի ժամանակ ենթադրում են, որ երկուշաբթի պետքարտուղարին կընդունի նաև նախագահ Թայիփ Էրդողանը։
Ըստ տեղեկությունների՝ այցի ընթացքում Բլինքենը թուրք գործընկերոջ հետ քննարկելու է երկրաշարժերի հետևանքների վերացման, Շվեդիայի և Ֆինլանդիայի՝ ՆԱՏՕ-ին անդամակցելու դիմումների, Ուկրաինայի հակամարտության վերաբերյալ և երկկողմանի հարցեր։
Ավելի վաղ Բլինքենը ժամանել էր Ադանա նահանգի Ինջիրլիք ավիաբազա, որտեղ ծառայում են ամերիկացի զինվորականները։ ՏԱՍՍ-ը հաղորդել է, որ այդ օրը Չավուշօղլուն և Բլինքենը թռիչքներ են կատարել Թուրքիայի հարավ-արևելքում երկրաշարժից տուժած շրջաններով։ ԱՄՆ-ն հայտարարել է, որ նախատեսել է 185 միլիոն դոլարի օգնություն տրամադրել Թուրքիային:
