Պեկինը անշեղորեն կպահպանի Թեհրանի հետ բարեկամությունն ու համագործակցությունը՝ հայտարարել է Չինաստանի նախագահ Սի Ծինփինը Իրանի նախագահ Էբրահիմ Ռայիսիի հետ հանդիպման ժամանակ:
«Անկախ նրանից, թե ինչպես կփոխվի միջազգային և տարածաշրջանային իրավիճակը, Չինաստանն անշեղորեն կպահպանի Իրանի հետ բարեկամությունն ու համագործակցությունը և առաջ կտանի չին-իրանական համապարփակ ռազմավարական գործընկերությունը»,- հայտարարել է ՉԺՀ նախագահը՝ հաղորդում է IRNA գործակալությունը:
Հիշեցնենք, որ Իրանի նախագահի գլխավորած բարձրաստիճան պատվիրակությունը Չինաստանի նախագահի հրավերով եռօրյա այցով գտնվում է Պեկինում: Սիի և Ռայիսիի ներկայությամբ Պեկինի ու Թեհրանի միջև ստորագրվել է համագործակցության 20 համաձայնագիր՝ ճգնաժամերի կառավարման, զբոսաշրջության, կապի և տեղեկատվական տեխնոլոգիաների, շրջակա միջավայրի, միջազգային առևտրի, մտավոր սեփականության, գյուղատնտեսության, արտահանման, առողջապահության, լրատվամիջոցների, սպորտի և մշակութային ժառանգության ոլորտներում:
Չինաստանի ԱԳՆ պաշտոնական ներկայացուցիչ Վան Վենբինը ևս կառուցողական է որակել Պեկինի և Թեհրանի միջև բարեկամական հարաբերությունների զարգացումը: Նրա խոսքով՝ այդ երկրների երկկողմ հարաբերությունները որևէ երրորդ երկրի դեմ չեն, այլ հօգուտ երկու երկրների ժողովուրդների և Մերձավոր Արևելքի կայունության:
