Եվրահանձնաժողովի զեկույցը Վրաստանի՝ ԵՄ անդամակցության դիմումի վերաբերյալ հաստատում է, որ հանրապետությունն արժանի է համայնքի թեկնածուի կարգավիճակին։ Այս մասին ուրբաթ ճեպազրույցում հայտարարել է Վրաստանի արտգործնախարար Իլյա Դարչիաշվիլին, գրում է ՏԱՍՍ-ը։
«Զեկույցը, ինչպես և սպասվում էր, բավական դրական է, և ԵՄ-ն ընդունել է Վրաստանի զգալի առաջընթացը գրեթե բոլոր ոլորտներում: Կարևոր է նաև, որ զեկույցը դրական է գնահատել Վրաստանի ջանքերն այն ոլորտներում, որոնք ներառում են Վրաստանի օրենսդրական և ինստիտուցիոնալ համատեղելիությունը ԵՄ-ի հետ»,- ասել է նախարարը և ընդգծել, որ փաստաթուղթը ևս մեկ անգամ հստակ հաստատում է, որ Վրաստանն արժանի է թեկնածու երկրի կարգավիճակի տրամադրմանը։
Եվրահանձնաժողովը հինգշաբթի մանրամասն զեկույց է հրապարակել Վրաստանի, Մոլդովայի և Ուկրաինայի՝ Եվրամիությանն անդամակցելու դիմումների վերաբերյալ։ Փաստաթղթում դրական է գնահատվել Վրաստանի ձեռքբերումները անօրինական միգրացիայի, ահաբեկչության դեմ պայքարի, պետական գնումների, արդարադատության, ազատության, անվտանգության և այլ ոլորտներում։
2022 թվականի հունիսին ԵՄ առաջնորդները ԵՄ թեկնածուի կարգավիճակ շնորհեցին Մոլդովային և Ուկրաինային, սակայն մերժեցին Վրաստանին: Նրանք Թբիլիսիին ներկայացրեցին 12 առաջարկ՝ ապագայում հանրապետությանը ԵՄ թեկնածուի կարգավիճակ շնորհելու համար: Դրանք վերաբերում են կոռուպցիայի դեմ պայքարին, օրենքի գերակայության ամրապնդմանը, օլիգարխների դեմ օրենքի ընդունմանը, օմբուդսմենի ընտրության օրենսդրության բարելավմանը և այլ ասպեկտների:
