Հայաստան ենք եկել զարգացնելու միջխորհրդարանական հարաբերությունները` հաշվի առնելով նաև այն հանգամանքը, որ այս տարի կլրանա երկկողմ դիվանագիտական հարաբերությունների հաստատման 31-ամյակը: Այս մասին ասել է Մեքսիկայի Պատգամավորների պալատի Մեքսիկա-Հայաստան բարեկամության խմբի նախագահ Բերենիսե Խուարես Նավառետեն: Վերջինիս գլխավորած պատվիրակության հետ հունվարի 17-ին հանդիպել են ՀՀ Ազգային ժողովի Հայաստան-Մեքսիկա բարեկամական խմբի անդամները:
.jpg)
Բերենիսե Խուարես Նավառետեն, շնորհակալություն հայտնելով ընդունելության համար, կարևորել է, մասնավորապես, մշակույթի, կրթության, ինչպես նաև տնտեսական ոլորտներում փոխգործակցության զարգացումը: Ողջունելով հյուրերի այցը Հայաստան՝ հայ խորհրդարանականները նույնպես արժևորել են երկու երկրների օրենսդիրների, մասնավորապես, բարեկամական խմբերի միջև համագործակցության խորացումը, ինչպես նաև երկկողմ հետաքրքրություն ներկայացնող բնագավառներում փոխգործակցության զարգացումը: Հայաստան-Մեքսիկա բարեկամական խմբի անդամ Գուրգեն Արսենյանի խոսքով Հայաստանի և Մեքսիկայի ժողովուրդների միջև բարեկամությունը ձևավորված է շատ վաղուց, ունի խոր արմատներ:
Բերենիսե Խուարես Նավառետեն էլ կարծիք է հայտնել, որ երկու երկրների պատմություններում էլ կան ցավոտ էջեր: Հանդիպման ընթացքում Հայաստան-Մեքսիկա բարեկամական խմբի անդամները բարձրաձայնել են Հայաստանի և Լեռնային Ղարաբաղի դեմ շարունակվող ադրբեջանական ագրեսիայի մասին, անդրադարձել Լաչինի միջանցքի շրջափակմանը և դրա հետևանքով ստեղծված հումանիտար խնդիրներին:
Հայ խորհրդարանականները ստեղծված իրավիճակում կարևորել են միջազգային հանրության արձագանքը:
Անդրադառնալով տարածաշրջանում խաղաղության հաստատմանը` բարեկամական խմբի անդամ Արթուր Խաչատրյանը նշել է. «Մենք չենք կարող խոսել երկարաժամկետ խաղաղության մասին, քանի դեռ չի լուծվել ԼՂ հակամարտությունը, և չի ընդունվել Արցախի ժողովրդի ինքնորոշման իրավունքը»:
Պատգամավորի խոսքով՝ օրակարգային է միջազգային հանրության անդրադարձն Արցախի ժողովրդի ինքնորոշման իրավունքի հարցին՝ հիմքում ունենալով «Ճանաչում հանուն փրկության» բանաձևը:
