Հանրապետական կոնգրեսական Մայքլ ՄաքՔոլը պահանջել է, որ ԱՄՆ պետքարտուղարությունը փաստաթղթեր տրամադրի Աֆղանստանից ամերիկյան զորքերի դուրսբերման վերաբերյալ, հայտնում է CNN-ը։
Քաղաքական գործիչը հարցում է ուղարկել գերատեսչություն և արձագանքելու վերջնաժամկետ է սահմանել՝ հունվարի 26-ը։ Միաժամանակ նա սպառնացել է դատի տալ, եթե մեկնաբանություն չլինի։
Հեռուստաալիքի տվյալներով՝ ՄաքՔոլը կոմիտեի գործընկերների հետ անցյալ տարի երեք հարցում էր ուղարկել Պետդեպարտամենտին։ Այն ժամանակ հանրապետականները փոքրամասնություն էին կազմում Ներկայացուցիչների պալատում, սակայն նոր կազմով Կոնգրեսի աշխատանքների իրավիճակը փոխվել է։
Իր կոչում կոնգրեսական ՄաքՔոլը պահանջել է նախագահ Ջո Բայդենի վարչակազմի բոլոր միջգերատեսչական հանդիպումների ցանկը՝ կապված զորքերի դուրսբերման հետ, ինչպես նաև տեղեկություններ թալիբների ներկայացուցիչների հետ բոլոր հանդիպումների մասին՝ սկսած 2021 թվականի հունվարից։ Կոմիտեն հետաքրքրված է նաև Աֆղանստանից ամերիկյան զորքերի դուրսբերման հետևանքների ուսումնասիրությամբ։
