CNN-ը անդրադարձել է Լաչինի միջանցքի շուրջ զարգացումներին, ներկայացրել դրա արգելափակումից հետո Արցախում ստեղծված իրավիճակը:
Հոդվածի համաձայն՝ այսպես կոչված «բնապահպան-ցուցարարները» Լաչինի միջանցքը փակել են Ադրբեջանի կառավարության աջակցությամբ, քանի որ, ըստ ադրբեջանցի քաղաքական վերլուծաբանների, այդ երկրում ցույցերն անօրինական են համարվում, քանի դեռ դրանք չեն արժանանացել կառավարության հավանությանը:
Լրատվականը նշում է, որ Արցախը բազմաթիվ խնդիրների առաջ է կանգնել: ՅՈՒՆԻՍԵՖ-ը նախազգուշացնում է, որ երեխաներն ունեն անհրաժեշտ սննդի և ծառայությունների պակաս, նրանց մի մասը բաժանված է ծնողներից կամ խնամակալներից: Չնայած այս դժվարություններին՝ Լեռնային Ղարաբաղի հայերը չեն հուսահատվում:
«ԱՄՆ-ը, ԵՄ-ն, ՄԱԿ-ի գլխավոր քարտուղարը և մեկ տասնյակից ավելի երկիր, այդ թվում՝ Կանադան և Մեքսիկան, Ադրբեջանին կոչ են արել բացել Լեռնային Ղարաբաղ ճանապարհը, սակայն այդ կոչերն անտեսվել են, իսկ Ռուսաստանը չի կարողացել նշանակալի քայլեր ձեռնարկել»,- նշվում է հոդվածում: Գործակալությունը նաև պնդում է, որ Ադրբեջանը, օգտագործելով նավթի և գազի պաշարները, փորձում է առավելություններ ստանալ:
