1988 թվականի ավերիչ երկրաշարժի 34-րդ տարելիցի կապակցությամբ Լոռու մարզպետ Արամ Խաչատրյանի հետ միասին Սպիտակ են այցելել ՀՀ տարածքային կառավարման և ենթակառուցվածքների նախարար Գնել Սանոսյանը, արտակարգ իրավիճակների նախարար Արմեն Փամբուխչյանը, Հայաստանում Ճապոնիայի դեսպան Մասանորի Ֆուկուշիման:
Սպիտակում 1988 թ. երկրաշարժի զոհերի հիշատակին նվիրված խաչքարի մոտ կատարվել է հոգեհանգստյան կարգ՝ ի հիշատակ աղետի անմեղ զոհերի:
Ներկաները ծաղիկներ են խոնարհել հուշակոթողին: Ծաղիկներ են խոնարհվել նաև կողք կողքի տեղադրված Ճապոնիայի ահեղ ցունամիի զոհերի հիշատակին նվիրված հուշարձանին:
Դեսպան Ֆուկուշիման նշել է, որ իրենք հայ ժողովրդի կողքին են եղել թե՛ աղետի օրերին և թե՛ հետագա տարիներին՝ օգնելով մեղմել վիշտը, հաղթահարել դժվարությունները, ու շնորհակալ են նաև հայ ժողովրդին ճապոնացիների համար ծանր օրերին իրենց կողքին լինելու համար:
Այցելություն է կատարվել նաև Սպիտակի հրշեջ-փրկարարական ջոկատ:
Պաշտոնյաները եղել են նաև Վանաձորի Սուրբ Մարիամ Աստվածածին եկեղեցու Սրբոց Նահատակաց պուրակում, որտեղ երկրաշարժի զոհերի հիշատակին նվիրված խաչքարի մոտ՝ նախագահությամբ Գուգարաց թեմի առաջնորդ Գերաշնորհ Տեր Հովնան եպիսկոպոս Հակոբյանի, կատարվել է հոգեհանգստյան կարգ՝ ի հիշատակ երկրաշարժի զոհերի:
«1988-ի դեկտեմբերի 7-ը մեծ ողբերգություն էր հայ ժողովրդի համար, սակայն հայը չի հուսահատվել, այլ կրկին շտկել է մեջքն ու վերածնվել: Մեզ օգնության շտապեցին աշխարհի գրեթե բոլոր ծայրերից՝ աղետի գոտին վերածելով համամարդկային գթասրտության օջախի։ Այսօր մեր շնորհակալության անկեղծ ու ջերմ խոսքն ենք ուղղում բոլոր նրանց, ովքեր մեզ հետ էին, օգնում և սատարում էին»,- ասել է Լոռու մարզպետը:
