Որևէ փոփոխություն տեղի չի ունեցել: Կառավարության նիստից հետո՝ լրագրողների հետ ճեպազրույցում, անդրադառնալով Ջերմուկում սահմանային իրավիճակին, ասաց Վայոց ձորի մարզպետ Արարատ Գրիգորյանը:
«Ընդհանուր որևէ լարվածություն չկա, անհանգստացնող միջադեպեր չեն եղել»,- հայտնեց Գրիգորյանը:
Մարզպետը վստահեցրեց, որ բնակիչների մեծ մասը վերադարձել է Ջերմուկ:
Ինչ վերաբերում է ադրբեջանական վերջին ագրեսիայի հետևանքով առողջարանային բիզնեսի կրած վնասներին, ապա Արարատ Գրիգորյանը հայտնեց, որ բազմաթիվ քննարկումներ են եղել ՀՀ էկոնոմիկայի նախարարության հետ, հանդիպումներ են եղել հյուրանոցների տնօրենների հետ:
«Որպես այդպիսին՝ հիմա գործարկվող ծրագրեր չկան, բայց ծրագրերի նախագծեր քննարկվում են»,- ասաց մարզպետը:
Ինչ վերաբերում է Ջերմուկի վնասված ճոպանուղուն, ապա, մարզպետի խոսքով, ամեն ինչ արվում է, որ այն գործի:
«Ե՛վ լարեր են վնասվել, և՛ տարբեր մասեր, որ լրացուցիչ ուսումնասիրություն է պահանջվում: Ամեն ինչ անում ենք, որ այն գործի»,- ասաց Գրիգորյանը:
Ինչ վերաբերում է ԵՄ դիտորդական առաքելությանը, Վայոց ձորի մարզպետը նշեց, որ դիտորդների հետ պարբերաբար հանդիպումներ են ունենում:
