Կառավարության հեղինակած Հարկային օրենսգրքում փոփոխությունների արդյունքում, ըստ ՀՀ ՊԵԿ նախագահի տեղակալ Արթուր Մանուկյանի, կներդվի հարկ վճարողների անձնական հաշվի քարտերում առկա պարտավորությունների և դեբետային գումարների մարման հաջորդականության նոր մեթոդաբանություն:
ՊԵԿ նախագահի տեղակալը նշել է, որ հարկային պարտավորությունների և դեբետային գումարների հաշվառումը կիրականացվի նախկինում ներկայացված և ճշտված հարկային հաշվարկով առաջացած տարբերության գումարի չափով:
Արթուր Մանուկյանի հավաստմամբ նախատեսվում է վերանայել ԱԱՀ-ի և ակցիզային հարկի փոխհատուցվող գումարների հաշվին ԱԱՀ-ի և ակցիզային հարկի պարտավորությունների մարման, այդ գումարների միասնական հաշվին մուտքագրման գործընթացը:
Նշվել է նաև, որ ԱԱՀ-ի և ակցիզային հարկի պարտավորությունների մարման, այդ գումարների միասնական հաշվին մուտքագրման գործընթացի վերանայմամբ փոփոխություն է կատարվել ԵՏՄ անդամ պետություններից ապրանքների ներմուծման մասով վճարված ԱԱՀ-ի գումարների հաշվանցման մասով: Այդ փոփոխությամբ սահմանվում է, որ ԵՏՄ անդամ պետություններից ապրանքների ներմուծման մասով վճարված ԱԱՀ-ի գումարները ենթակա են հաշվանցման ապրանքների ներմուծման օրը ներառող հաշվետու ժամանակաշրջանում:
Շահութահարկի և ռոյալթիների փոխհատուցվող գումարների միասնական հաշվին մուտքագրման հետ կապված առաջարկվում է կիրառել այն նույն կարգավորումները, որոնք նախատեսվում են ԱԱՀ-ի և ակցիզային հարկի ռիսկային չհամարվող փոխհատուցվող գումարների միասնական հաշվին մուտքագրման համար:
ՊԵԿ փոխնախագահը նշել է, որ հարկման հատուկ համակարգում գործող հարկ վճարողը մինչև տվյալ հաշվետու ժամանակաշրջանին հաջորդող ամսվա 20-ը ներառյալ պետք է սահմանված կարգով ներկայացնի ԱԱՀ-ի և ակցիզային հարկի միասնական հաշվարկ:
«Օրենքի նախագծի ընդունումը կապահովի հարկ վճարողների կողմից հարկային պարտավորությունների մարմանն ուղղվող ֆինանսական միջոցների առավել արդյունավետ տնօրինման հնարավորություն»,- ասել է Արթուր Մանուկյանը:
ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանի հավաստմամբ օրենքը կյանքի կոչվելով? այն կապահովի, այսպես ասած, հաշվապահական ճկունություն տնտեսվարողների և ՊԵԿ-ի հարաբերություններում:
Քննարկման արդյունքում օրինագիծը ստացել է դրական եզրակացություն:
«ՀՀ հարկային օրենսգրքում փոփոխություններ և լրացումներ կատարելու մասին» օրենքի նախագիծը քննարկվել է ԱԺ տնտեսական հարցերի մշտական հանձնաժողովի` նոյեմբերի 30-ի նիստում:
