Իր պաշտօնավարման վեցամեայ ժամկէտի աւարտէն մէկ օր առաջ` հոկտեմբերի 30-ին Լիբանանի նախագահ Միշէլ Աուն լքեց Պաապտայի նախագահական պալատը, իսկ երկրին մէջ սկսաւ կառավարական ճգնաժամ: Լիբանանի խորհրդարանը արդեն եօթներորդ անգամ չկարողացաւ երկրի նախագահ ընտրել:
Նախագահի ընտրութեան համար թեկնածուն պէտք է ապահովէ խորհրդարանի անդամներու քուէներու երկու երրորդը, այսինքն՝ 86 ձայն։ Լիբանանի օրէնքին համաձայն՝ երկրի քրիստոնէական և իսլամական համայնքները խորհրդարանին մէջ ունին հաւասար՝ 64-ական տեղ, իսկ երկրի նախագահի պաշտօնը կրնայ միայն զբաղեցնել Քրիստոնեայ մարունին:
Մինչև հիմա չկայ այն անձը, որ թէ քրիստոնեաներուն և թէ իսլամներուն մեծամասնութիւնը և համախոհութիւն կրցաւ ապահովել։
Հակոբ Բագրատունի (Լիբանանի խորհրդարանի պատգամավոր, հայկական խմբակցության ներկայացուցիչ) - Շաբաթը անգամ մը խորհրդարանը նիստ կը գումարէ, բայց խորհրդարանը չի կրնար նախագահ ընտրել, որովհետև երկու երրորդի ներկայութեամբ պէտք է մեծամասնութիւն ապահովուի, այդ մեծամասնութիւնը չապահովուիր քուէի իմաստով թէ որ թեկնածուն է։
Համաձայնութեան հասնելու բարդութիւնը միայն Լիբանանի ներքին խնդիրներով չէ պայմանաւորուած: Պակաս ազդեցիկ չեն արտաքին գործoնները:
Վանիկ Տաքեսյան (Սոցիալ-դեմոկրատ հնչակյան կուսակցության Լիբանանի շրջանի ատենապետ) - Ընդհանրապէս բոլոր նախագահները որ ընտրուած են Լիբանանի մէջ եղած է արևելեան և արևմտեան երկիրներու համաձայնութեամբ և անշուշտ այս անգամ տակաւին մասնաւոր համաձայնութիւն մը չկայ, շատ մը գործօններ կան որ կը խոչընդոտեն այս ընտրութիւնը։
Ներկայիս աշխարհաքաղաքական զարգացումները աւելի կը բարդացնեն իրավիճակը:
Հակոբ Բագրատունի - Անշուշտ կան զանազան խնդիրներ Ուքրանիոյ պատերազմէն սկսեալ մինչև Սուրիոյ պատերազմ, մինչև Իրան Միացեալ Նահանգներ հիւլիական խօսակցութիւններ մինչև Սէուտական Արաբիայ Իրան յարաբերութիւններու չակերտուած մեղմացում, բայց կանխատեսել թէ երբ պէտք է նախագահ ընտրել կ'ենթադրեմ որ միայն մարգարէանալ կարելի է։
Կառավարական ճգնաժամը սակայն բացասական կ'անդրադառնայ արդեն բարդ վիճակի մէջ յայտնուած Լիբանանի տնտեսութեան վրայ: Ներկայիս ժամանակաւոր կառավարութիւնը կը զբաղի միայն ընթացիկ հարցերով և լիազօրութիուններ չունի հակաճգնաժամային ոլորտի մէջ լուրջ որոշումներ կայացնելու համար:
Շահան Գանտահարյան (Բեյրութի «Ազդակ» օրաթերթի գլխավոր խմբագիր) - Երբ չկայ նախագահ չկայ նաև գործող կառավարութիւն, որոշում առնելու լիազօրութիւն չունեցող կառավարութիւն ինչպէս պիտի փուլ առ փուլ նաև իրականացնեն հակաճգնաժամային ծրագիրները, առաւել եւս արտաքին օժանդակութիւնները չկան և Համաշխարհային պանքի կամ միջազգային ֆոնտերու յատկացումները սառեցուած են։
Բոլորին վկայութեամբ Լիբանանը քաղաքացիական պատերազմի ամենէն դժնդակ օրերուն, թէժ օրերուն նման տագնապի չէր մատնուած։ Երկրի բոլոր վարիչները վայրկեան մը առաջ նախագահի ընտրութեան կարևորութիւնը կը շեշտեն, սակայն համախոհութիւն ապահովող անունը տակաւին անյայտ է։
Հակոբ Բագրատունի - Անշուշտ բոլորի յայտարարած փափաքը այն է, որ ընտրենք նախագահ այսօր վաղուընէ աւելի լաւ է սակայն ես անձամբ կը կարծեմ որ գէթ երկու երեք ամիս տակաւին պիտի սպասենք նախագահի ընտրութեան։
Վանիկ Տաքեսյան - Նախագահի բացակայութիւնը ասկէ առաջ ալ եղած է, նախագահի աթոռը պարապ եղած է, սակայն այս մեր դժուար ժամանակին մէջ այս վիճակը կրնայ ըլլալ բաւական երկարի և չեմ գիտեր որքան, քանի որ շատ կարևոր է ներքին և արտաքին համախոհութիւնը և համաձայնութիւնը։
Չնայած անորոշութեան և ոչ լաւատեսական սպասումներուն՝ Լիբանանի քաղաքական ուժերը կը պատրաստուին նախագահի ընտրութեան արդեն ութերորդ փորձին, որ տեղի պիտի ունենայ դեկտեմբեր 1ին։
Հեղինակ՝ Փաթիլ Մկրտիչեան
