Ռոբերտ Քոչարյանի և Արմեն Գևորգյանի գործով առանցքային վկա՝ գործարար Սիլվա Համբարձումյանի բանկային քաղվածքը անգլերենից հայերեն թարգմանելուց հետո անունը վերածվել է թվերի:
Այս և թարգմանչական այլ խոտանների մասին դատական նիստին բարձրաձայնել է մեղադրող դատախազ Գևորգ Բաղդասարյանը:
Դատարանն այսօր ուսումնասիրում էր Համբարձումյանի բանկային փոխանցումները, և թարգմանչական խնդիրներն ի հայտ են եկել հենց այդ ժամանակ: Ըստ դատախազի՝ եթե մեղադրանքի հիմքում դրված ապացույցն այս տեսքով հետազոտվի, հետագայում վիճարկելու է պաշտպանական կողմը՝ առնվազն անհասկանալի լինելու պատճառաբանությամբ:
Ռոբերտ Քոչարյանի պաշտպան Հովհաննես Խուդոյանն էլ նկատել է՝ թարգմանիչը պատշաճ քրեադատավարական ընթացակարգով չի ներգրավվել, և կողմերը հնարավորություն չեն ունեցել ստուգելու նրա թեկնածությունը:
Նիստը հետաձգել է մեկ շաբաթով՝ թարգմանչի ներկայությունն ապահովելու համար:
Հիշեցնենք՝ Ռոբերտ Քոչարյանը մեղադրվում է 3 միլիոն դոլար կաշառք ստանալու, իսկ Արմեն Գևորգյանը՝ 1 միլիոն դոլար կաշառք ստանալու և փողերի լվացման համար:
Հեղինակ՝ Տաթև Խաչատրյան
