2 տարեկան Գեորգին է, մանկական վարակաբանն ասում է՝ այսպիսի երեխաները կոչվում են հաճախ հիվանդացող երեխաներ ու բժիշկների հատուկ ուշադրության կարիքն ունեն: 2 ամսում արդեն 2 անգամ թոքաբորբ է ունեցել: Շնչառական հիվանդացությունն ամենաշատը արձանագրվել է մինչև 4 տարեկանների շրջանում:
Շտապօգնության կանչերի 7.1 տոկոսը կազմում են սուր շնչառական վարակով հիվանդները, իսկ նման կանչերի 46 տոկոսը կազմում են մինչև 18 տարեկանները: 2022-ի նոյեմբերի 10-ին Հայաստանի ամբուլատոր-պոլիկլինիկական կազմակերպություններ դիմել են ՍՇՎ-ով 958 պացիենտ, հիվանդությունը նախորդ տարվա այս ժամանակահատվածի նույն մակարդակի վրա է, թոքաբորբ ախտորոշմամբ դիմողների թիվն աճել է:
Ռոմելլա Աբովյան (ՀՀ ԱՆ ՀՎԿԱԿ վարակիչ և ոչ վարակիչ հիվանդությունների համաճարակաբանության վարչության պետ) - Հոսպիտալացման աճի միտում ունեն, ՍՇՎ-ով հոսպիտալացվածների 98.9 տոկոսը կազմում են 0-18 տարեկանները, և հոսպիտալացման թվերն աճել են 11 տոկոսով:
Հայաստանում հայտնաբերվել է գրիպի A տեսակի H1N1 ենթատեսակի վիրուսի հարուցիչ: Հայտնաբերվել են նաև ռինովիրուսի, բոկավիրուսի, ռեսպիրատոր սինցիտիալ վիրուսի հարուցիչներ: Մանկական վարակաբան Գոհար Թամազյանը նշում է՝ կարևորը առաջին իսկ ախտանշանների դեպքում ինքնաբուժմամբ չզբաղվելն է, հարկավոր է անմիջապես դիմել տեղամասային բժշկին, մեկուսանալ կամ մեկուսացնել երեխային, շատ հեղուկ օգտագործել:
Գոհար Թամազյան (Ինֆեկցիոն հիվանդությունների ազգային կենտրոնի մանկական վարակաբան) - Գալիս են սովորական շնչառական պատկերով՝ հազ, փռշտոց, բարձր ջերմություն, ինտոքսիկացիայի նշաններ, թուլություն, շատ հաճախ հանդիպում է ասթմատիկ հազի պատկեր՝ դա ամենավտանգավոր ախտանիշներից մեկն է, որի ժամանակ հոսպիտալացումը պարտադիր է:
Ռոմելլա Աբովյան - Եվ շատ մի կարևոր խորհուրդ՝ ինքնաբուժմամբ չզբաղվել ու չօգտագործել հակաբիոտիկներ, ինչը մեր բնակչության շրջանում շատ ա օգտագործվում, հիշեցնեմ, որ դրանք սուր վարակիչ հիվանդության համար չեն նախատեսված, դրանք մանրէային վարակների կամ վիրուսների բարդությունների համար են, այն էլ՝ միայն բժշկի նշանակմամբ:
Սուր շնչառական հիվանդություններից խուսափելու լավագույն տարբերակը պատվաստումն է՝ ասում է իմունականխարգելման և կառավարելի վարակիչ հիվանդությունների համաճարակաբանության բաժնի պետը: Հայաստանի բոլոր պոլիկլինիկաները, ամբուլատորիաներն ապահովված են սեզոնային գրիպի քառավալենտ պատվաստանյութով:
Սվետլանա Գրիգորյան (ՀՀ ԱՆ ՀՎԿԱԿ իմունականխարգելման և կառավարելի վարակիչ հիվանդությունների համաճարակաբանության բաժնի պետ) - Այն պարունակում է 2 A տիպի գրիպի դեմ, այդ թվում նաև՝ H1N1-ի, H3N2-ի դեմ և 2 B տիպի վիրուսի, այսինքն՝ պատվաստվելով այս պատվաստանյութով՝ գրիպի առնվազն 4 ենթատեսակներից պաշտպանված կլինեն: Դրանք ավելի ռիսկային խմբերի համար են, դրանք են՝ մինչև 5 տարեկանները, 65-ից մեծ քաղաքացիները և հղիները, քրոնիկ հիվանդություն ունեցողները, բուժաշխատողները, զորակոչի ենթակա անձինք, կոլեկտիվներում աշխատողները:
Սվետլանա Գրիգորյանը հստակեցնում է՝ այն, որ Հայստանում դեռևս H1N1-ի 1 դեպք է արձանագրվել, չի նշանակում, որ վիրուսը տարածում չի ստացել. օր առաջ անհրաժեշտ է պատվաստվել և այդպիսով պաշտպանել նաև ռիսկի խմբի քաղաքացիներին: Ի դեպ, եվրոպական երկրներում և ՌԴ-ում գրիպով պայմանավորված հիվանդացության աճ է գրանցվել: Լաբորատոր հետազոտությունների արդյունքում նմուշների մոտ 20 տոկոսում հայտնաբերվել են գրիպի A տեսակի H1N1 ենթատեսակի հարուցիչներ:
