ԱՄՆ Կոնգրեսի միջանկյալ ընտրությունների բոլոր ընտրատեղամասերը փակվել են, սկսվել է ձայների հաշվարկը՝ հայտնում են ամերիկյան լրատվամիջոցները։
Նախնական տվյալով՝ Հանրապետական կուսակցությունն ԱՄՆ Կոնգրեսի Ներկայացուցիչների պալատում ստացել է 220 տեղ՝ առաջ անցնելով Դեմոկրատական կուսակցությունից, որը ստացել է 215 մանդատ, հայտնում է NBC News-ը։
Հեռուստաալիքը նաև կանխատեսում է, որ դեմոկրատներից Կոնգրես կարող է մտնել Ներկայացուցիչների պալատի ներկա խոսնակ Նենսի Փելոսին։
Քվեարկության արդյունքներով կընտրվեն Ներկայացուցիչների պալատի բոլոր 435 անդամներն ու Սենատի մեկ երրորդը։ Բացի այդ, ընթացիկ միջանկյալ ընտրություններում ընտրվում են 36 նահանգի և ԱՄՆ երեք անդրծովյան տարածքների նահանգապետներ։ Ամերիկյան առաջատար լրատվամիջոցներին հասանելի նախնական տեղեկատվության համաձայն՝ հանրապետականները հաղթել են 22 նահանգում, դեմոկրատները՝ 13-ում։
CNN հեռուստաալիքն ուշադրություն է հրավիրել այն փաստի վրա, որ հանրապետական Ռոն Դեսանտիսը վերընտրվել է Ֆլորիդայի նահանգապետի պաշտոնում։ Ինտրիգը, ըստ հեռուստաալիքի, այն է, որ նա կարող է իր թեկնածությունն առաջադրել ԱՄՆ նախագահի պաշտոնի համար 2024 թվականի ընտրություններում՝ դառնալով Թրամփի ներկուսակցական մրցակիցը։
