Հայաստանի տարածքային զարգացման հիմնադրամը մինչև հաջորդ տարեվերջ նախատեսում է շահագործման հանձնել նորակառույց ու սեյսմակայուն 10-ը դպրոց: Մեկը՝ Երևանի Աջափնյակ վարչական շրջանի համար 111 հիմնական դպրոցն է:
Հայկ Գալստյան (ՀՀ Տարածքային զարգացման հիմնադրամի սեյսմիկ անվտանգության բարելավման ծրագրի համակարգող) - Երևանի համար 111 հիմնական դպրոցը 432 աշակերտի համար նապատեսված հիմնական դպրոց է, որի ընդհանուր արժեքը 1 մլրդ 600 մլն դրամ է: Նախատեսված է ավարտել 2023-ի փետրվարի վերջին կամ մարտի սկզբին:
Ներկայումս դպրոցն ունի 260 աշակերտ: Կառուցումից հետո կրթական հաստատությունը կարող է ընդունել շուրջ 600 աշակերտ: Հաշվի են առել հարակից տարածքում կառուցվող բնակելի շենքերը:
Հայկ Գալստյան - Աշխատանքները համաձայն ժամանակացույցի ընթանում են, հնարավոր են ուշացումներ՝ պայմանավորված եղանակային պայմաններով:
Եթե ձմեռը բարեհաճ լինի, գարնանը դպրոցը կհանձնեն շահագործման՝ նշում է շինարարական աշխատանքների ղեկավարը:
Հայկ Օհանյան (աշխղեկ) - Բետոնային աշխատանքները հասնում են ավարտին, իսկ համընթաց կատարվում են ներքին հարդարման աշխատանքները՝ ներսի, սվաղի:
Աշխատանքները սկսել են նախորդ տարվա մարտից, նախ ապամոնտաժել են 60-ականների շենքն ու սկսել նորի կառուցումը:
Հայկ Օհանյան - Դպրոցը միաձույլ երկաթբետոնե կառուցվածք է՝ մինչև 9 բալ երկրաշարժի համար նախատեսված: Ունի նաև սպորտդահլիճ, բազմաֆունկցիոնալ դահլիճ, խաղահրապարակ, սպորտային հրապարակ:
Քանի դեռ շինարարությունն ընթացքի մեջ է, հիմնադրամը կահավորման հարցերն է լուծում:
Հայկ Գալստյան - Աշակերտական սեղան-աթոռ, գրատախտակ, պահարան... Նաև ճաշարանի կահավորման մասին է խոսքը, այսինքն՝ առաջին անհրաժեշտության կահույքի մասին է խոսքը:
8 մասնաշենքից բաղկացած դպրոցը գերհագեցած է, ժամանակակից, հարմարեցված՝ հաշմանդամություն ունեցողների համար՝ վերելակ, թեքահարթակ և այլն: Այս նախագծով դպրոցներ են կառուցվում Հայաստանի տարբեր համայնքներում:
Հայկ Գալստյան - Ունենք Ստեփանավանում, Վանաձորում, Հրազդանում, Փարաքարում, Փոքր Վեդու միջնակարգ դպրոցը: Դրանք են հիմնականում, որ գրեթե նույն նախագծի շրջանակներում կառուցվում են: Մոդուլային դպրոց են:
Սեյսմիկ անվտանգության բարելավման ծրագրով նախատեսում են մյուս տարի վերակառուցել ևս 14 դպրոց:
