Արդարադատության նախարարության նախաձեռնությամբ ձևավորվել է Հայաստանում ստեղծվող նոր Արբիտրաժային կենտրոնի Խորհրդատվական հանձնաժողովը, որը նպատակ ունի մասնագիտական աջակցություն ցուցաբերել կենտրոնի ստեղծման աշխատանքներին:
Խորհրդատվական հանձնաժողովի կազմում ընդգրկվել է արբիտրաժի ոլորտում հանրաճանաչ միջազգային և ազգային 26 մասնագետ: Ընդ որում՝ նոր արբիտրաժային կենտրոնի ստեղծումից հետո Խորհրդատվական հանձնաժողովի անդամները կարող են հետագայում դիտարկվել նաև որպես նոր կենտրոնի Արբիտրաժային խորհրդի անդամի թեկնածուներ և արբիտրներ:
Խորհրդատվական հանձնաժողովում են ներգրավվել ինչպես կայացած արբիտրաժային պրակտիկա ունեցող տարբեր երկրների՝ Ամերիկայի Միացյալ Նահանգների, Միացյալ Թագավորության, Ֆրանսիայի, Գերմանիայի, Շվեդիայի, Սինգապուրի, Չինաստանի (Հոնգ Կոնգ), Արաբական Միացյալ Էմիրությունների, Ռուսաստանի Դաշնության, այնպես էլ հայտնի արբիտրաժային հաստատություններում փորձառություն ունեցող ներկայացուցիչներ:
Խորհրդատվական հանձնաժողովի գործունեության ոլորտը ներառում է կենտրոնի անհրաժեշտ փաստաթղթերի ցանկի, արբիտրաժային կանոնների, ներքին այլ կանոնակարգերի քննարկումը և հաստատումը, ինչպես նաև կենտրոնի կառուցվածքի, առավել արդյունավետ մոդելի, այդ թվում` արբիտրաժային վճարների քաղաքականության և այլնի վերաբերյալ խորհրդատվության տրամադրումը:
