Վոլոդիմիր Զելենսկին հայտարարել է, որ Կիևի առաջարկած անվտանգության երաշխիքները չեն ենթադրում ՆԱՏՕ-ի զորքերի տեղակայում Ուկրաինայում որևէ պետության հնարավոր հարձակման դեպքում:
«Ներկայումս մեզ ցուցաբերվող օգնության և անվտանգության երաշխիքների միջև տարբերությունն այն է, որ անվտանգության երաշխիքները փաստաթուղթ է, որը պետք է ստորագրեն համապատասխան պետությունները: Այդ երաշխիքները կարող են տարբեր լինել՝ ֆինանսական միջոցներ, սպառազինություն, պատժամիջոցներ, անվտանգության քաղաքական երաշխիքներ, հումանիտար աջակցություն»,- ասել է Զելենսկին BBC-ի հետ հարցազրույցում։
Նրա խոսքով՝ Կիևը չի ցանկանում, որ ՆԱՏՕ-ի երկրներից քաղաքացիական անձինք կամ զինվորականներ կռվեն ուկրաինական հողում. խոսքն Ուկրաինայի համար «միասնական չափանիշների և փաթեթի մասին է», քանի դեռ երկիրը ՆԱՏՕ-ի կազմում չէ։
Սեպտեմբերի 13-ին Ուկրաինայի նախագահի գրասենյակը հրապարակել էր «Կիևի անվտանգության համաձայնագրի» նախագիծը, որը ենթադրում է միջազգային երաշխիքներ Կիևին։ Մեկնաբանելով այդ փաստաթուղթը՝ Կրեմլի խոսնակ Դմիտրի Պեսկովը հայտարարել էր, որ Ուկրաինային անվտանգության երաշխիքներ կարող է տալ միայն երկրի ղեկավարությունը:
