Ազգային ժողովն առաջին ընթերցմամբ ընդունել է Կառավարության հեղինակած՝ «Փաստաբանության մասին» օրենքում և Քրեական օրենսգրքում փոփոխությունների փաթեթը։ Նախատեսվում է ընդլայնել հանրային պաշտպանի ծառայություններից օգտվողների շրջանակը: Մինչև 16 տարեկան երեխաները և պարտադիր ժամկետային ծառայողները կկարողանան օգտվել հանրային պաշտպանի անվճար ծառայությունից: Մեկ այլ փոփոխություն վերաբերում է Հայաստանում գտնվող օտարերկրացիներին:
Գրիգոր Մինասյան (ՀՀ արդարադատության նախարարի տեղակալ) - Եթե նրա նկատմամբ արտաքսման որոշում է կայացվում մեր երկրում, նա կարողանում է բողոքարկել անվճար իրավաբանական ծառայության միջոցով: Եվ նաև անձանց, ում վերաբերյալ իրականացվում է անգործունակ կամ սահմանափակ գործունակ ճանաչելու, անգործունակ ճանաչված քաղաքացուն գործունակ ճանաչելու կամ քաղաքացու գործունակության սահմանափակումները վերացնելու գործերի վարույթ:
Ըստ փոխնախարարի՝ օրենքում փոփոխությունները նաև թույլ են տալիս լիցենզավորված փաստաբաններին կամավոր, անվճար իրավաբանական օգնություն տրամադրել քաղաքացիներին և այդպիսով ազատվել որոշակի պարտավորություններից, օրինակ՝ պարտադիր փաստաբանական դպրոցում դասերի մասնակցությունից:
Գրիգոր Մինասյան - Այս մոտիվացիոն համակարգով մենք խթանում ենք անվճար իրավաբանական օգնությունը, որը ստանալու են մարդիկ շատ պրոֆեսիանալ փաստաբանների կողմից:
Չկա՞ արդյոք այս դրույթում ռիսկ, որ փաստաբանները՝ պաշտպանյալի հետ պայմանավորվածությամբ, կարող են խուսափել որոշակի պարտավորություններից: Գրիգոր Մինասյանը նշում է, այդ ռիսկը հաշվի են առել, մշակելու են վերահսկողական գործիքներ: Նախագծի մեկ այլ առաջարկ է՝ ստեղծել նոր մասնագիտացված մարմին՝ կարգապահական հանձնաժողով, որը կունենա փաստաբաններին կարգապահական պատասխանատվության ենթարկելու իրավասություն: Իսկ կարգապահական հանձնաժողովի որոշումները հնարավոր կլինի բողոքարկել փաստաբանների պալատի խորհրդում:
Գրիգոր Մինասյան - Եթե փաստաբանը ինչ-որ խախտում է թույլ տվել, նրա դեմ կարող է լինել քննիչը, դատախազը, քաղաքացի, կողքի փաստաբանը, երբ տեսնում է, որ իր կոլեգան ապօրինություն է ցուցաբերում, և այդ հանձնաժողովը, մասնագիտաբար քննելով այս կամ այն փաստաբանի գործը, եթե սանկցիա կիրառի փաստաբանի նկատմամբ, հնարավորություն կա բողոքարկելու փաստաբանական խորհուրդ:
Կընդլայնվեն նաև փաստաբանների պալատի խորհրդի լիազորությունները հատկապես հանրային պաշտպանների գործունեության բնագավառում. խորհրդին կվերապահվի հանրային պաշտպանների գործունեությունը ստուգելու և գնահատելու գործառույթ:
Փաստաբանների որակավորման կարգը ևս կվերանայվի: Այսպես, ի տարբերություն ներկայումս գործող կարգի, երբ որակավորման քննություններին կարողանում են մասնակցել միայն փաստաբանական դպրոցում ուսանածները, նախագծով սահմանվում է, որ առանց այդ դպրոցում սովորելու՝ փաստաբանի որակավորման քննությանը կկարողանան մասնակցել նաև իրավագիտության բակալավրի և մագիստրոսի աստիճան ունեցողները կամ իրավաբանական կրթություն ստացած և առնվազն յոթ տարվա մասնագիտական ստաժ ունեցող անձինք, նաև նախկինում առնվազն 5 տարվա փաստաբանական գործունեության ստաժ, առնվազն 5 տարվա քննիչի, դատախազի կամ դատավորի ստաժ ունեցողները կամ իրավաբանական գիտությունների թեկնածուները ու դոկտորները:
Նախագիծն օրենք կդառնա, երբ ԱԺ-ն այն ընդունի նաև երկրորդ ընթերցմամբ:
