Գյումրու Սուրբ Յոթ Վերք եկեղեցում այսօր պատարագ է մատուցվել` նվիրված 44-օրյա պատերազմում նահատակված հերոսների հիշատակին։ Պատարագին ներկա են եղել մարզային իշխանությունների ներկայացուցիչները՝ մարզպետ Նազելի Բաղդասարյանի գլխավորությամբ:
Ի հիշատակ հայրենիքի համար կյանքը զոհած հայորդիների՝ հավատացյալներն աղոթք են հղել առ Աստված:
«Ադրբեջանի սանձազերծած պատերազմից անց երկու տարի մենք հիշում ենք, ոգեկոչում ենք մեր սուրբ նահատակներին, որոնք ընկան հանուն հայրենիքի, անմահացան, որպեսզի մենք այսօր շեն պահենք մեր երկիրը։
Ցավոք, այս երկու տարվա ընթացքում մենք ազգովի բավարար դասեր չենք քաղել, որպեսզի բռունցքվենք, միասնական լինենք և դիմակայենք նոր արհավիրքների։
Ադրբեջանը, որն այժմ էլ ոտնձգություն է անում մեր ինքնիշխան տարածքին, արհամարհում է միջազգայնորեն ընդունված բոլոր չափորոշիչները և բաց կերպով, ինչպես երկու տարի առաջ, այդպես էլ այսօր դիմում է բազմաթիվ պատերազմական հանցագործությունների։ Անմեղ տղաների կյանք, ավերված բնակավայրեր և անց երկու տարի շուրջ երեք տասնյակ գերեվարված անձինք, որոնց հրաժարվում են հայրենադարձնել ու նրանց գումարվել են ևս երկու տասնյակ տղաներ, որոնք գերեվարվել են վերջին իրադարձությունների ժամանակ։ Ու բազմաթիվ միջազգային կոչերին, հորդորներին ի հակադրումն ագրեսորը շարունակում է իր վայրագ ծրագիրը,- ասել է Շիրակի մարզպետը։
