Քաղաքաշինության, տեխնիկական և հրդեհային անվտանգության տեսչական մարմինը նոր հենակետը տեղադրել է Երևան-Էջմիածին մայրուղու 16-րդ կիլոմետրին` Զվարթնոցի մոտ: Մասնագետների համոզմամբ` ծանրաքաշ բեռների փոխադրման ընթացքում ճանապարհածածկը շատ արագ քայքայվում և փչանում է: Սրանով փորձում են նվազագույնի հասցնել վնասները: Կշռման առաջին կայանը փորձարկվել էր Սիսիանում:
Ելենա Զոհրաբյան (ՔՏՀԱՏՄ հանրության հետ տարվող աշխատանքների բաժնի պետ) - Երկրորդ ստատիկ կշեռքը տեղադրվեց Արմավիրի մարզում` նաև հաշվի առնելով այն հանգամանքը, որ մարզում շինանյութերի, մասնավորապես` ավազի, քարի տեղափոխման, արդյունահանման աշխատանքների ծավալը մեծ է:
Տեսչական մարմինը միջպետական և հանրապետական նշանակության ավտոճանապարհներին ծանրաքաշ տրանսպորտային միջոցների կշռման գործընթացը սկսել է դեռ 2020 թվականից: Այն մարզերում, որտեղ դեռ անշարժ կշեռքների կայաններ չկան, գործում են շարժական կշեռքներ:
Մեքենաներից մեկն ավազ էր տեղափոխում, թույլատրելի զանգվածը գերազանցել էր մոտ 29 տոննայով: Տեսչականի մասնագետները փաստն արձանագրեցին, տեղում վարչական արձանագրություն կազմեցին: Կիրականացվի վարույթ, կորոշվի տուգանքի չափը:
Արամ Աղայան (ՔՏՀԱՏՄ տրանսպորտային անվտանգության վարչության գլխավոր մասնագետ) - Ընդհանուր զանգվածը տրանսպորտային միջոցի եղել է 60 տոննա 750 կգ: Սռնիների թույլատրելի զանգվածը պետք է լիներ 9.5 տոննա, տանող սռնին, սակայն, տվյալ տրանսպորտային միջոցի` մոտ 21 տոննա 980 էր, իսկ երկրորդ տանող սռնին՝ 23 տոննա 570:
Նկարահանման պահին վարորդներից շատերը դժգոհում, հրաժարվում էին մեքենան կշռել՝ պատճառաբանելով, որ մի անգամ տուգանվել են:
Տեսչական մարմինը ճանապարհային ոստիկանության հետ համատեղ ծանրաքաշ և մեծ եզրաչափերով բեռնված մեքենաների կշռումն իրականացնելու է 24-ժամյա ռեժիմով:
Ելենա Զոհրաբյան - Անշարժ հենակետում կշռման իրականացման գործընթացից զատ, նշեմ, որ Արմավիրի մարզում զուգահեռ իրականացվելու է նաև շարժական կշեռքներով կշռման գործընթաց` տարբեր հատվածներում, որպեսզի վերահսկողությունը և շրջանցման մեխանիզմները տվյալ ճանապարհահատվածի հնարավորինս տեսչական մարմնի վերահսկողության ներքո լինեն:
Քաղաքաշինության, տեխնիկական և հրդեհային անվտանգության տեսչական մարմինը հանրապետության ամբողջ տարածքում նախատեսում է 7 անշարժ կայան տեղադրել: Թե կոնկրետ որ մարզերում և երբ կտեղադրի մնացած 5-ը, հայտնի չէ:
Վերջին մեկ ամսում տեսչականի մասնագետները միայն Սիսիանի հենակետում կշռել են մոտ 6200 բեռնատար, 620-ի դեպքում խախտում հայտնաբերել: Ծրագրի գործարկումից մինչև օրս շարժական և անշարժ կշեռքներով կշռվել է ավելի քան 12000 տրանսպորտային միջոց, որից մոտ 2000-ը տուգանվել են 200.000 դրամով, չմասնատվող բեռի դեպքում՝ յուրաքանչյուր տոննան՝ 200.000 դրամ: Այդպիսի դեպքերը եղել են 8-ը: Տեսչական մարմինը օրենսդրական փոփոխությամբ է հանդես եկել, առաջարկում են տուգանքի չափը որոշել ըստ բեռնվածության աստիճանի:
