ՄԱԿ-ում Ռուսաստանի մշտական ներկայացուցիչ Վասիլի Նեբենզյան հայտարարել է, որ Մոսկվան դեմ է Ուկրաինայի նախագահ Վոլոդիմիր Զելենսկու վիրտուալ մասնակցությանը համաշխարհային կազմակերպության Անվտանգության խորհրդի նիստին։ Այս մասին հայտնում է ՏԱՍՍ-ը։
Դիվանագետը պարզաբանել է, որ Ռուսաստանը, սկզբունքորեն, չի առարկում Ուկրաինայի ղեկավարի կամ նրա ներկայացուցչի ելույթին։ «Բայց միայն նման մասնակցությունը պետք է լինի դեմ առ դեմ, այսինքն՝ նրա ֆիզիկական ներկայությունն Անվտանգության խորհրդի դահլիճում»,- ընդգծել է դիվանագետը և հավելել, որ նման պահանջը ռուսական կողմի քմահաճույքը չէ, այլ թելադրված է կանոններով, որոնք կարգավորում են խորհրդի աշխատանքները։
Չորեքշաբթի՝ օգոստոսի 24-ին, ՄԱԿ-ում Չինաստանի մշտական ներկայացուցիչը, որն օգոստոսին նախագահում է Անվտանգության խորհուրդը, հայտնել է, որ Զելենսկին հանդիպմանը կմասնակցի տեսակապի միջոցով։ Համապատասխան առաջարկը ստացվել է Ուկրաինայի մշտական ներկայացուցչությունից։ Քանի որ Մոսկվան դեմ էր տեսակապի ձևաչափին, քվեարկություն է անցկացվել։ ՄԱԿ-ի Անվտանգության խորհրդի 13 անդամ հանդես է եկել Ուկրաինայի ղեկավարի վիրտուալ մասնակցության օգտին, Ռուսաստանը դեմ է արտահայտվել, Չինաստանը ձեռնպահ է մնացել։
