Լիտվայի արտաքին գործերի նախարար Գաբրիելյուս Լանդսբերգիսը հայտարարել է, որ երկիրը գործնականում դադարեցրել է Ռուսաստանի քաղաքացիներին զբոսաշրջային վիզաների տրամադրումը. այժմ վիզաներ է տալիս միայն հումանիտար նկատառումներից ելնելով:
Նրա խոսքով՝ պատճառն այն է, որ Ուկրաինայում ռազմական գործողությունների սկսվելուց ի վեր մեծ թվով մարդիկ են Լիտվայում ապաստան փնտրում:
«Մենք կարծում ենք, որ դա պետք է լինի համաեվրոպական որոշում, քանի որ Շենգենյան համակարգն աշխատում է այսպես, մեր սահմանները մարդկանց ներս են թողնում սպունգի պես»,- ասել է պաշտոնյան:
Ֆինլանդիայի արտաքին գործերի նախարար Պեկա Հաավիստոն իր հերթին հայտնել է, որ երկրի կառավարությունը հաստատել է ռուսաստանցիներին տրվող տուրիստական վիզաների թիվը 10 անգամ կրճատելու մասին որոշումը։ Սահմանափակումներն ուժի մեջ կմտնեն սեպտեմբերի սկզբից:
