Վարչապետի աշխատակազմի ղեկավար Արայիկ Հարությունյանը ֆեյսբուքյան էջում նոր մանրամասներ է հայտնել սեպտեմբերին կայանալիք Ստարմուս փառատոնի վերաբերյալ:
«Դուք դեռ մտածում եք՝ գնա՞լ Ստարմուսի միջացառումներին, թե՞ ոչ. Հայաստան են գալիս Ջիմ Բաղյանն ու Թոնի Ֆադելը: StarmusVI-ի բոլոր օրերը շատ հետաքրքիր են՝ ելույթների ու համերգների մասով, սակայն 4-րդ օրը՝ սեպտեմբերի 8-ը, առանձնահատուկ է։ Ելույթների ու խոսնակների ցանկը միայն բավական է` դրանում համոզվելու համար։
Այդ օրը, օրինակ, հայազգի առաջին տիեզերագնաց, բժիշկ և ինժեներ Ջեյմս Բաղյանը կխոսի այն մասին, թե ինչ մարտահրավերներ ունի մարդը՝ տիեզերքում։ Հաջորդ ելույթով նորարար, ipod-ի գյուտարար և iphone-ի համաստեղծող Թոնի Ֆադելը կխոսի այն մասին, թե ինչպես են տեխնոլոգիական սիներգիաներն օգնում մեզ` ինչպես Երկրի վրա, այնպես էլ տիեզերքում։
Վու Ջին կներկայացնի Չինաստանի՝ թափ հավաքող տիեզերագնացության ծրագիրը, իսկ ձեռնարկատեր, մեր հայրենակից Կամ Ղաֆարյանը կպատմի այն մասին, թե ինչպիսի տնտեսություն մենք կարող ենք ստեղծել՝ Երկիր մոլորակից դուրս։
Շտապեք ամրագրել ձեր տոմսերը՝ մարդկության ապագան արդեն այսօր տեսնելու համար»,- գրել է նա։
