ՀՀ բարձր տեխնոլոգիական արդյունաբերության նախարար Ռոբերտ Խաչատրյանը հուլիսի 26-ին ընդունել է «Էյ Էմ Դի» ընկերության և «Ներդրումների աջակցման կենտրոն» հիմնադրամի ներկայացուցիչներին:
Նախարար Ռոբերտ Խաչատրյանը ողջունել է հյուրերին և ներկայացրել նախարարության նպատակները, գործունեության հիմնական ուղղությունները, իրականացվող ծրագրերն ու նախագծերը: Նախարարը մասնավորապես խոսել է ոլորտի ընկերություններին տրամադրվող պետական աջակցությունների, թվայնացման ռազմավարության, Ազգային վենչուրային հիմնադրամի, «Ինժեներական քաղաք» և կրթական ծրագրերի մասին:
Ռոբերտ Խաչատրյանը կարևորել է ընկերության կողմից առաջարկվող ծրագրային և ինժեներական նորագույն լուծումները՝ հատկապես միկրոէլեկտրոնիկայի ոլորտում:
«Էյ Էմ Դի» ընկերության կորպորատիվ հարցերով փոխնախագահ Ամիթ Գուպտան շնորհակալություն է հայտնել ընդունելության համար և իր հերթին ներկայացրել ընկերության կատարած աշխատանքները, ծրագրերը, դրանց զարգացման հեռանկարները: Անդրադարձ է եղել նաև ոլորտում առկա խնդիրներին, մասնավորապես՝ տեխնոլորտում որակավորված աշխատուժի պակասին:
Հանդիպման ընթացքում կողմերը քննարկել են ոլորտային գործակցության մի շարք հնարավորություններ, այդ թվում՝ ոլորտում մեծ պահանջարկ ունեցող մասնագետների պատրաստմանն ուղղված համատեղ ծրագրերի իրագործմանը, Հայաստանում ընկերության գործունեության ընդլայնման հեռանկարներին առնչվող հարցեր:
