Բարձրագույն դատական խորհուրդը Վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմի դատավորի թափուր տեղի համար առաջադրել է Լուսինե Աբգարյանի, Կարեն Բատիկյանի և Սերգեյ Չիչոյանի թեկնածությունները:
ԲԴԽ անդամ Դավիթ Խաչատուրյանը ներկայացրել է թեկնածուների կենսագրական տվյալները, մասնագիտական որակներն ու անցած ճանապարհը:
Թեկնածու Լուսինե Աբգարյանը ներկայացրել է կոռուպցիայի դեմ պայքարի վերաբերյալ որոշ նկատառումներ: Ըստ նրա՝ կոռուպցիան խախտում է իրավունքի գերակայությունը, ոտնահարում քաղաքացիների սահմանադրական իրավունքները: Բանախոսը շեշտադրել է կոռուպցիայի դեմ արդյունավետ պայքարի անհրաժեշտությունը: Նշվել է, որ Վճռաբեկ դատարանի հակակոռուպցիոն պալատի ստեղծումով կամբողջանա կոռուպցիայի դեմ պայքարը, ինչը կնպաստի կանխատեսելի արդարադատության միջավայրի ձևավորմանն ու զարգացմանը:
Թեկնածու Սերգեյ Չիչոյանն իր ելույթում խոսել է հակակոռուպցիոն դատարանի դերի և նշանակության, ինչպես նաև դատական իշխանությունում տեղի ունեցող դրական և բացասական գործոնների մասին: Նա անդրադարձել է որոշ խնդիրների, որոնք տեղի են ունենում դատական իշխանությունում: Սերգեյ Չիչոյանը բարձրաձայնել է նաև այն դրական փոփոխությունները, որոնք տեղի են ունեցել վերոնշյալ ոլորտում` դատաիրավական բարեփոխումների շրջանակում: «Վերջին տարիների ընթացքում կարելի է փաստել, որ իշխանության երեք ճյուղերի կողմից գործադրած ջանքերի շնորհիվ դատավոր դառնալու ցանուկություն ունեցողների թիվը համեմատության մեջ բավականին աճել է: Շուրջ 1 տարի առաջ ունեինք 230 գործող դատավոր: Կառավարության և ԱԺ-ի ջանքերի շնորհիվ թիվն ավելացել է՝ դառնալով 280»,- նշել է թեկնածուն:
Վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմի դատավորի մյուս թեկնածուն՝ Կարեն Բատիկյանը, արտահերթ նիստին ներկա չի եղել:
