Բնակավայրերի միավորման գործընթացը մեր երկրում շարունակվում է: Ազգային Ժողովի արտահերթ նիստից առաջ Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովը խորհրդարանական լսումներ է կազմակերպել: Թեման՝ «վարչատարածքային բաժանման մասին» օրենքում փոփոխություններ կատարելու օրենքի նախագիծն է:
Վահե Ղալումյան (ՀՀ ԱԺ ՏՏԳՇՄՊ հարցերի մշտական հանձնաժողովի նախագահ) - Տեսանելի է, որ արդեն խոշորացված համայնքների բնակչությունը ժամանակի ընթացքում պրոցեսի դրական արդյունքները վեր է դասում փոքր տեղային հարցերից: Սկզբնական շրջանում գյուղապետարանների հաստիքների կրճատումը հետագայում համալրվելու է նոր հաստիքներով, որոնք մեծացնելու են համայնքների պոտենցիալը, և որին, համոզված եմ, ըմբռնումով են մոտենում մեր քաղաքացիները:
Տարածքային կառավարման և ենթակառուցվածքների փոխնախարար Վաչե Տերտերյանը ներկայացնում է փոփոխությունների փաթեթը, որով մի քանի մարզի բնակավայրեր կմիանան՝ դառնալով մեկ վարչական միավոր:
Վաչե Տերտերյան (ՀՀ տարածքային կառավարման և ենթակառուցվածքների նախարարի տեղակալ) - Արագածոտնի մարզում Թալին համայնք, որը կմիավորի Թալին և Արագածավան համայնքները, Գեղարքունիքի մարզում Ճամբարակ համայնքը, որը կմիավորի Ճամբարակը և Շողակաթը, Լոռու մարզում Ալավերդի համայնք, որը կմիավորի Ալավերդին, Ախթալան, Շնողը և Օձունը, Լոռու մարզում Տաշիր համայնք, որը կմիավորի Տաշիրը, Մեծավանը, Սարչապետը, և Սյունիքի մարզում Սիսիան համայնք, որը կմիավորի Սիսիան ու Գորայք համայնքները:
Վաչե Տերտերյանի խոսքով՝ թվերն են փաստում խոշորացումը շարունակելու անհրաժեշտությունը: Խոշորացված համայնքները կարողանում են իրենց վրա վերցնել մի շարք խնդիրներ ու լուծել դրանք:
Վաչե Տերտերյան - Խնդիրներ, որոնք կապված են համայնքի բարեկեցության ապահովման, ենթակառուցվածքների բարելավման, ներդրումային ֆոնի ապահովման, ինչպես նաև պետության կողմից որոշակի գործառույթներ համայնքներին փոխանցելու և՛ հրամայականով, և՛ քաղասքական հանձնառությամբ, և՛ նպատակահարմարությամբ: Խոսքը կարող է լինել Կառավարության որոշման մասին, որով 60 պետական ծառայություն նախատեսվում է փոխանցել համայնքների քաղաքացիների սպասարկման գրասենյակներով իրականացնելուն:
Խոշորացման դրական արդյունքի վառ ապացույցներից է սուբվենցիոն ծրագրերի ծավալների աննախադեպ աճը: 2019-ի համեմատ բոլոր համայնքներում ծրագրերի աճը մի քանի անգամ է՝ եթե համայնքը շատ ծրագրեր է ներկայացնում, նշանակում է գումար է կոնսոլիդացնում, իսկ սա արդյունավետ աշխատանքի, ճիշտ վարչարարության գրավական է:
Վաչե Տերտերյան - Միշտ ասել ենք դրա մասին, որ խոշորացումը չպիտի դիտել մեկանգամյա պրոցես, որ պիտի արվի ու հուր հավիտյան մնա: Դա կառավարման համակարգի մասին է, էդ կառավարման համակարգը երկրի տնտեսական, քաղաքական, սոցիալական, միջազգային ամենատարբեր իրողություններ ձևավորող գործոնների տակ կարող է փոփոխվել:
Փարաքար համայնքի ղեկավարի տեղակալ Գոռ Սարիբեկյանը նախ իր դիրքորոշումն է հայտնում՝ համայնքներում բացակայում են ստրատեգիական երկարատև զարգացման պլանները, ապա հետաքրքրվում՝ նպատակարհամար չէ՞ արդյոք ստեղծել զարգացման նման ծրագրեր, որոնց արդյունքում սուբվենցիաներն էլ կբխեն այդ ծրագրից, և չեն լինի կամայական որոշումներ:
Վաչե Տերտերյան - Մենք էսօր ունենք 5-ամյա զարգացման ծրագիր համայնքի և ձեր ասած բոլոր սուբվենցիոն ու ոչ միայն, համայնքի բոլոր ճիգերը պիտի տեղավորվեն էդ 5-ամյա զարգացման ծրագրի շրջանակում:
Նախկինում հատկապես փոքր համայնքները մոտիվացված չէին գումար հավաքել, քանի որ դրա ծավալն այնքան քիչ էր, որ համայնքը չէր կարողանում հոգալ անգամ աշխատակիցների աշխատավարձի հարցը: Խոշորացումը հնարավորություն է տալիս շատ գումար հավաքել, ճիշտ բաշխել, հերթականությամբ համայնքները զարգացնել՝ նշում է Գևորգ Պապոյանը:
Գևորգ Պապոյան - Հաջորդ տարվա համար մեր կապիտալ ծախսերը ու սուբվենցիաներին ուղղվող գումարը շատ ավելի բարձր են լինելու, քան 2022 թվականին է, և սա հնարավորություն է տալիս ձեզ՝ համայնքներիդ, էականորեն ավելացնել այն ծրագրերն ու ծախսերը, որոնք դուք պլանավորել եք իրականացնել:
Գլխադասային հանձնաժողովի նախագահի խոսքով՝ լսումների ընթացքում քննարկումները վերահաստատեցին՝ խոշորացումը դրական գործընթաց է: Օրենսդրական փաթեթը Ազգային ժողովի հունիսի 9-ի արտահերթ նիստի օրակարգում:
