Ընդդիմադիրներն իրենց ակցիաներն այսօր սկսեցին առավոտյան. բետոնախառնիչ մեքենաներով փակել էին Կիևյան, Հաղթանակի և Դավթաշենի կամուրջները: Բետոնախառնիչների վարորդները մեքենաները թողել, հեռացել էին:
Քաղաքացիների ու ակցիայի մասնակիցներից մեկի միջև վիճաբանություն տեղի ունեցավ: Քաղաքացիներն օգնեցին ոստիկաններին բացել կամուրջը:
Ավելի ուշ փակել էին ևս մի քանի փողոց, որոնք րոպեներ անց ոստիկանությունը բացեց: Ժամը 14-ի դրությամբ ակցիայի մասնակիցներից 40 հոգի բերման ենթարկվեց:
Օրվա ընթացքում Ազգային անվտանգության ծառայությունը և ոստիկանությունը հաղորդագրություն տարածեցին, որ օպերատիվ տվյալներ են ստացել Ազգային ժողովի շենքը զավթելու մասին.
«ՀՀ ազգային անվտանգության ծառայությունում հավաստի օպերատիվ տվյալներ են ստացվել, որ Երևան քաղաքում անցկացվող հավաքի կազմակերպիչները մտադրված են այսօր անցկացվող ՀՀ ԱԺ հերթական նստաշրջանի ընթացքում սադրանքների միջոցով հրահրել հակաօրինական գործողություններ և դրդել հավաքի մասնակիցներին զավթել ԱԺ շենքը և հարկադրել կատարելու որևէ գործողություն՝ այդ կերպ ապակայունացնել երկրի ներքին անվտանգությունը, խաթարել հասարակական կարգն ու անվտանգությունը:
Ազգային անվտանգության ծառայությունը խստորեն նախազգուշացնում է հավաքի կազմակերպիչներին և դրանց մասնակիցներին՝ ձեռնպահ մնալ հակաօրինական գործողություններ կատարելուց՝ հակառակ պարագայում կատարվածի ողջ պատասխանատվությունը կրելու են դրանց կազմակերպիչները:
Ծառայությունը կոչ է անում բոլոր օրինապաշտ քաղաքացիներին՝ տուրք չտալ սադրանքներին, զերծ մնալ հակաօրինական քայլեր կատարելուց, չտրվել սադրանքներին՝ հակառակ պայմաններում հավասարապես կիսելու են քրեական պատասխանատվության ողջ բեռը»:
Ընդդիմադիրների հիմնական միջոցառումը մեկնարկեց 15.30-ին, Ֆրանսիայի հրապարակում:
Իշխան Սաղաթելյանն ընթերցեց, իրենց ձևակերպմամբ, «հանրային պահանջը» վարչապետի հրաժարականի մասին, որից հետո հավաքվածներին երթով ուղղորդեցին դեպի Ազգային ժողովի շենք: Այստեղ նրանք բախվեցին ոստիկանական պատին: Առաջ շարժվելու մի քանի անհաջող փորձ արեցին:
Ավելի քան մեկ ժամ անց ոստիկանությունը բացեց ճանապարհը և ընդդիմադիրներին թույլ տվեց շարունակել երթը, որը կենտրոնական 2-3 փողոցներով շրջելուց հետո վերադարձավ Ֆրանսիայի հրապարակ: