Հալէպի մէջ գործող Նոր Սերունդ Մշակութային Միութիւնը` հայ համայնքապետերու, ազգային կազմակերպութիւններու, հայկական միութիւններու ներկայացուցիչներու, Սուրիոյ խորհրդարանի հայ անդամներու և Հալէպի նահանգային խորհուրդէն հրաւիրեալներու մասնակցութեամբ նշեց իր հիմնադրութեան 65 ամեակը:
Ավետիս Խուշաֆյան (Սոցիալ-դեմոկրատ հնչակյան կուսակցության Սիրիայի հյուսիսային շրջանի ատենապետ) - Մշակութային և կազմակերպչական գործերով հասած ենք մինչև 1985, որ հիմնուած է առաջին պարախումբը Հալէպ գաղութին մէջ, ղեկավարութեամբ ընկ. Աբիկ Կոստանեանին, որ սանն էր մեծ պարուսոյց Ազատ Ղարիպեանին։
Յար և նման սփիւռքի տարածքին կազմաւորուած հայկական միութիւններուն, հայ մշակոյթի պահպանման առաքելութեամբ, 1957-ին հիմնադրուած է Նոր Սերունդ Մշակութային Միութիւնը։ 20-րդ դարու սկիզբը Հալէպի մէջ հիմնուած Կիլիկեան Գաղթականաց Վարժարանի շրջանաւարտից միութիւնը տարիներու ընթացքին ընդարձակելով իր գործունէութեան սահմանները հիմը դրած է Նոր Սերունդ Մշակութային Միութեան՝ ստանալով պետական արտօնագիր։
Մարալ Անուշյան-Գոնճայան («Նոր սերունդ» մշակութային միության վարչության անդամ) - Նոր Սերունդ Մշակութային Միութիւնը միշտ աշխատած է պահպանել հայ մշակոյթը իր աշխատանքներով։ Նոր Սերունդը հայապահպանման կարևոր գործը կատարած է։
Միութեան աշխատանքային բոլոր խումբերը մասնակցած էին յոբելինական հանդիսութեան: Այսպէս «Ղօղանջ» երգչախումբը ազգային ու հայրենասիրական երգերով, «Ազատ Ղարիպեան» պարախումբը հայկական և օտար պարերով, երաժշտական խումբի պարմանուհիները` քանոնի նուագակցութեամբ, «Անդրանիկ» թատերախումբը Յակոբ Պարոնեանի «Քաղաքավարութեան վնասները» գործէն պատառիկով մը ճոխացուցին ձեռնարկի յայտագիրը:
Թէև միութիւնը 65 տարիներ առաջ կեանքի կոչուած է, սակայն անոր արմատները կ՛երթան մինչև 1919 թուականը, երբ հիմնադրուած է «Անդրանիկ» թատերախումբը։ Թատերական գործունէութեան կողքին միութիւնը ունեցած է պարարուեստի խումբեր, երգչախումբ և նկարչական ու երաժշտական ակադեմիաներ։
Վիքի Գալուստյան («Նոր սերունդ» մշակութային միության վարչության անդամ) - Նոր Սերունդ Մշակութային Միութիւնը տարիներու ընթացքին ունեցաւ հսկայ աշխատանքներ, օրինակի համար «Անդրանիկ» թատերախումբ, որուն 100 ամեակը եղաւ երկու տարի առաջ, ունինք «Ազատ Ղարիպեան» պարախումբը, նաև «Տիգրան Չուխաճեան» երաժշտանոցը և «Ղօղանջ» երգչախումբը։
Պատերազմի տարիներուն Սուրիայէն գաղթած միութեան երէց և վաստակաշատ շարք մը անդամներ, նաև միութեան գեղարուեստական խումբերու հայրենի ղեկավարներ հեռահաղորդակցութեամբ փոխանցեցին միութեան դերակատարութեան կարևորութիւնը սփիւռքի մէջ և փոխանցեցին իրենց շնորհաւորանք 65 ամեակի առթիւ:
Հանդիսութեան աւարտին Բերիոյ Հայոց թեմի բարեջան առաջնորդ Տէր Մասիս Եպս. Զօպուեան կարևորեց սփիւռքի մէջ հայկական միութիւններու առաքելութիւնը հայ մշակոյթի պահպանման յոյժ կարևոր գործին մէջ:
Իր 65-ամեայ գործունէութեան ընթացքին միութիւնը հայրենիքի և սփիւռքի միջև կամուրջներ հաստատած է` հայրենի արուեստագէտներ ու մտաւորականներ Հալէպ հրաւիրելով։ Երկրի ապրած տնտեսական և ծառայողական ծանր պայմաններուն հանդերձ միութիւնը կը շարունակէ իր մշակութային գործունէութիւնը։
