Ապրիլի 15-ին Ռուսաստանի Դաշնությունում Հայաստանի դեսպանության շքասրահում տեղի է ունեցել դիվանագիտական ներկայացուցչության ներքո գործող մշակույթի կենտրոնի վերաբացման օրվան նվիրված հանդիսավոր միջոցառումը։
Երեկոն մեկնարկել է մշակույթի կենտրոնի պատմությանն ու վերաբացումից ի վեր գործունեությանը նվիրված տեսանյութի ցուցադրմամբ։
![](/attachments/images/278375344_355870719920914_1463175615058397847_n.jpg)
Միջոցառմանը ողջույնի խոսքով հանդես է եկել ՌԴ-ում ՀՀ արտակարգ և լիազոր դեսպան Վաղարշակ Հարությունյանը։ ՌԴ-ում ՀՀ դեսպանն իր խոսքում կարևորել է մշակույթի կենտրոնի գործունեությունը, որն ուղղված է Ռուսաստանում հայկական մշակույթի հանրահռչակմանը։
![](/attachments/images/278388133_355870943254225_2869368194374401506_n.jpg)
«Վերաբացված մշակույթի կենտրոնը կարողանում է մեր օրերում մեծ հաջողությամբ կյանքի կոչել իր առջև դրված պատասխանատու առաքելությունը, այն է՝ պահպանել հարուստ մշակութային ժառանգությունը, ներկայացնել այն հանրային լայն շրջանակներին և բազմապատկել այս պատերի ներքո սկիզբ առած լավագույն ավանդույթները»,- ասել է Վաղարշակ Հարությունյանը։
![](/attachments/images/278397439_355871743254145_4672743014069734561_n.jpg)
Մշակույթի կենտրոնի ղեկավար Վլադիմիր Գաբբեն, ելույթ ունենալով միջոցառմանը, ներկայացրել է կենտրոնի նոր հայեցակարգն ու խոսել ապագա նախաձեռնությունների մասին։
![](/attachments/images/278409625_355870796587573_7343830890552328227_n.jpg)
Երեկոն շարունակվել է ՌԴ վաստակավոր արտիստ Վյաչեսլավ Օլխովսկու, Moscow Classic Ensemble նվագախմբի և կենտրոնի ստեղծագործական խմբերի ելույթներով։