ՄԱԿ-ի բնակչության հիմնադրամի նախաձեռնությամբ միջազգային կառույցների ներկայացուցիչները Հայաստանի մարդու իրավունքների պաշտպանի ուղեկցությամբ ճանաչողական այցով Սյունիքի մարզում են եղել: Ծանոթացել են Արցախից տեղահանվածների և խոցելի խմբերի խնդիրներին: Պատվիրակության անդամները եղել են Կապանում, Գորիսում ու սահմանամերձ Դավիթ Բեկ բնակավայրում:
Քրիստիննե Գրիգորյան (ՀՀ ՄԻՊ) - Շատ կարևոր էր այս այցի ընթացքում դեսպանների մասնակցությունը, որ իրենք տեղում մարդկանցից լսեցին էն բոլոր խնդիրները, որոնք կան ու նաև դա իրենց գաղափարներ տվեց, թե ծրագրեր իրականացնելիս ինչպիսի կարիքներ կան հենց տեղում:
Այցի շրջանակում պատվիրակները եղել են Կապանի և Գորիսի կանանց ռեսուրս կենտրոնների սոցիալական ձեռնարկություններում։ Հայաստանում ԵՄ պատվիրակության ղեկավար Անդրեա Վիկտորինը հանդիպումների ավարտին նշել է՝ աջակցում են, որ Սյունիքի կանայք ավելի ուժեղ լինեն:
Անդրեա Վիկտորին (ԵՄ պատվիրակության ղեկավար, դեսպան) - Մենք պատրաստ ենք աջակցել, որ այստեղ նոր գաղափարներ և ծրագրեր իրականացվեն: Ես շատ տպավորված եմ Սյունիքի բնությամբ: Մենք աշխատում ենք տուրիզմի զարգացման ուղղությամբ:
Հայաստանում ՄԱԿ-ի մշտական համակարգողի պաշտոնակատարը առաջին անգամ է եղել Սյունիքում: Եռօրյա այցի ընթացքում հանդիպել է նաև արցախյան 44-օրյա պատերազմում անհետ կորած սյունեցիների հարազատների հետ:
Լիլա Փիթրս Յահիա (ՄԱԿ-ի մշտական համակարգողի պաշտոնակատար) - ՄԱԿ-ի գործընկերներիս և բոլոր միջազգային կառույցների հետ պետք է քննարկենք անհետ կորածների հարցերը և աջակցենք Հայաստանի կառավարությանը այս խնդիրները լուծելու համար:
Հայաստանում Լիտվայի դեսպանը նշել է, որ Լիտվայի դեսպանությունը այստեղ խթանում է վերականգնվող էներգիայի ոլորտի զարգացմանը, նաև աշխատում են կանանց ներուժի հզորացման ուղղությամբ:
Ինգա Ստանիտե-Տոլոչկիենեն (ՀՀ-ում Լիտվայի արտակարգ և լիազոր դեսպան) - Մենք հանդիպեցինք հասարակական կազմակերպությունների ներկայացուցիչներին ու շահառուներին, դժվար իրավիճակում հայտնված կանանց և այլ խոցելի խմբերին, կփորձենք օգտակար լինել:
Պատվիրակության անդամները Սյունիքից հեռացան հստակ որոշմամբ, որ արձանագրված հարցերի ու խնդիրների մասին այսուհետև կբարձրաձայնեն միջազգային հարթակներում:
Հեղինակ՝ Արմինե Սիմոնյան
