Շվեդիայի վարչապետ Մագդալենա Անդերսոնը մտադիր է ՆԱՏՕ-ին անդամակցության հայտ ներկայացնել դաշինքի գագաթնաժողովում, որը տեղի կունենա հունիսի 29-30-ը Մադրիդում՝ հայտնում է The Local Sweden պորտալը։
Տեղական Aftonbladet թերթի փոխանցմամբ՝ Շվեդիայի իշխող Սոցիալ-դեմոկրատական աշխատավորական կուսակցությունը մայիսի 24-ին կանցկացնի կուսակցության ղեկավարության արտահերթ նիստ, որի ընթացքում կուսակցական 26 շրջանի ներկայացուցիչներ կքննարկեն իրենց դիրքորոշումը Հյուսիսատլանտյան դաշինքին երկրի անդամակցության հարցում։ Մինչ այդ պետք է տեղական աշխատանք տարվի կուսակցության շարքային անդամների կարծիքը ճշտելու համար։
ՆԱՏՕ-ին անդամակցելու վերաբերյալ քննարկումներ են անցկացվում նաև Ֆինլանդիայում: Երկու երկրում այդ գործընթացը սկսվեց Ուկրաինայում Ռուսաստանի ռազմական գործողությունների պատճառով:
Միաժամանակ երկու պետությունն անիմաստ է համարել Հյուսիսատլանտյան դաշինքին անդամակցելու հարցում հանրաքվե անցկացնելու գաղափարը: Շվեդիայի և Ֆինլանդիայի իշխանությունները հայտարարում են, որ իրենց ժողովուրդները ԶԼՄ-ների միջոցով արդեն հստակ արտահայտել են իրենց դրական դիրքորոշումն անդամակցությանը:
