ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանն աշխատանքային այց է կատարել Արտաշատ քաղաք՝ ծանոթանալու տեղի մարզադաշտի վազքուղու կառուցման աշխատանքներին:
.jpg)
ԿԳՄՍ նախարարի տեղակալին ուղեկցել են սպորտային հատակների և աթլետիկական վազքուղիների արտադրությամբ զբաղվող շվեյցարական CONICA ընկերության ներկայացուցիչ Պավել Մառեսը, ԿԳՄՍՆ սպորտի քաղաքականության վարչության պետ Նարինե Շահբազյանն ու վարչության պետի տեղակալ Դավիթ Բաղումյանը:
.jpg)
ԿԳՄՍ նախարարության և CONICA-ի ներկայացուցիչներն Արտաշատ համայնքի ղեկավար Կառլեն Մկրտչյանի հետ շրջել են մարզադաշտի տարածքով, ծանոթացել արդեն իսկ իրականացված աշխատանքներին և քննարկել առաջիկա անելիքները:
Վազքուղու կառուցման հիմնային՝ ջրահեռացման, բետոնապատման ու չափագրման աշխատանքներն արդեն ավարտված են:
.jpg)
ԿԳՄՍ նախարարի տեղակալի խոսքով՝ CONICA-ի ներկայացուցիչը ժամանել է Հայաստան՝ համոզվելու, որ դրանք համապատասխանում են որակական չափանիշներին:
Ռետինե ծածկը փռելու համար համապատասխան տեխնիկա է անհրաժեշտ, որը Հայաստանում չկա: Կողմերը նաև պայմանավորվել են, թե ինչպես են դրանք բերվելու Հայաստան: Կարեն Գիլոյանի հավաստմամբ՝ այս փուլի բոլոր աշխատանքները գրեթե ավարտված են, իսկ մոտ 10-15 օր հետո ռետինե ծածկն ու անհրաժեշտ տեխնիկական միջոցները Հայաստանում կլինեն:
Արտաշատի քաղաքային մարզադաշտի վազքուղու կառուցման աշխատանքները, հավանական է, ավարտին կհասցվեն մայիսի վերջին:
ԿԳՄՍՆ-ից հիշեցնում են, որ Արտաշատի քաղաքային մարզադաշտի վազքուղիները և աթլետիկական հատվածները սինթետիկ ծածկույթով վերանորոգելու համար ՀՀ կրթության, գիտության, մշակույթի և սպորտի նախարարության 2021 թվականի պետական բյուջեով հատկացված միջոցների վերաբաշխման միջոցով տրամադրվել էր շուրջ 71 մլն դրամ: Օբյեկտի շինարարական, նախագծային արժեքը կազմել էր շուրջ 310 մլն դրամ, որից վազքուղիների նորոգման աշխատանքներինը ՝ շուրջ 243 մլն դրամ: Վազքուղիները և աթլետիկական հատվածները սինթետիկ ծածկույթով վերանորոգելու համար ՀՀ պետական բյուջեից հատկացվել էր 71 մլն 860.4 հազար դրամ, իսկ անհրաժեշտ գումարի մյուս մասը տրամադրել են Աթլետիկայի ֆեդերացիաների միջազգային ասոցիացիան և բարերարները: Միջազգային չափանիշներին համապատասխանող վազքուղու կառուցումը թույլ կտա Արտաշատի մարզադաշտում անցկացնել ինչպես մարզային և հանրապետական, այնպես էլ միջազգային մրցումներ: Բացի դրանից՝ ժամանակակից տեխնիկական կառույցների առկայությունը կնպաստի մարզաձևի զարգացմանը և հայ մարզիկների՝ համաշխարհային կարևորագույն մրցումներում բարձր արդյունքներ գրանցելուն:
