ՄԱՀԱՑԵԼ Է ՎԼԱԴԻՄԻՐ ԺԻՐԻՆՈՎՍԿԻՆ
Մահացել է Ռուսաստանի Լիբերալ-դեմոկրատական կուսակցության ղեկավար, ՌԴ Պետդումայի պատգամավոր Վլադիմիր Ժիրինովսկին: Այդ մասին հայտնել է Պետդումայի խոսնակ Վյաչեսլավ Վոլոդինը։
«Ծանր ու երկարատև հիվանդությունից հետո կյանքից հեռացել է Վլադիմիր Ժիրինովսկին։ Առանց նրա դժվար է պատկերացնել ժամանակակից Ռուսաստանի քաղաքական համակարգի զարգացման պատմությունը»,- նշել է նա։
Փետրվարի սկզբին Ժիրինովսկին հոսպիտալացվել էր երկկողմանի թոքաբորբով, որը զարգացել էր կորոնավիրուսի օմիկրոն շտամի պատճառով։
ԲԼԻՆՔԵՆԸ ԿՈՉ Է ԱՐԵԼ ԳՈՐԾԻ ԴՆԵԼ ԴԻՎԱՆԱԳԻՏԱԿԱՆ ՋԱՆՔԵՐԸ
Միացյալ Նահանգների պետքարտուղար Էնթոնի Բլինքենը և Ադրբեջանի նախագահ Իլհամ Ալիևը հեռախոսազրույց են ունեցել, որի շրջանակում քննարկել են Երևանի և Բաքվի հարաբերությունները, տարածաշրջանում ստեղծված իրավիճակը, անդրադարձել Ուկրաինայում ընթացող զարգացումներին:
Պետքարտուղարն աջակցություն է հայտնել Հայաստանի և Ադրբեջանի միջև հետագա խաղաղ բանակցություններին, այդ թվում՝ ՀՀ վարչապետ Նիկոլ Փաշինյանի և Իլհամ Ալիևի՝ ապրիլի 6-ին նախատեսված հանդիպմանը Եվրոպական խորհրդի նախագահ հետ։
Բլինքենը նաև կոչ է արել զսպվածություն դրսևորել և թուլացնել լարվածությունը և վերականգնել դիվանագիտական ջանքերը:
Բլինքենը հաստատել է, որ Միացյալ Նահանգները պատրաստ է օժանդակել երկրներին՝ որպես ԵԱՀԿ Մինսկի խմբի համանախագահ, և այդ հարցում ներգրավել համախոհ գործընկերների։ «Վաշինգտոնը ցանկանում է հասնել տարածաշրջանում երկարատև համապարփակ խաղաղության»,- ասված է Պետքարտուղարության հայտարարության մեջ։
ՄՈՍԿՎԱՆ ԿԻԵՎԻՑ ԱՎԵԼԻ ՄԵԾ ԱԿՏԻՎՈՒԹՅՈՒՆ Է ԱԿՆԿԱԼՈՒՄ
Կիևի շրջանից ռուսական զորքերը դուրս բերելու հրամանը տվել է անձամբ ՌԴ նախագահ Վլադիմիր Պուտինը՝ ֆրանսիական LCI հեռուստաալիքին տված հարցազրույցում հայտարարել է Կրեմլի խոսնակ Դմիտրի Պեսկովը։
«Դա անհրաժեշտ էր բանակցությունների համար բարենպաստ պայմաններ ստեղծելու համար՝ որպես բարի կամքի դրսևորում։ Բանակցությունների ընթացքում կարող են լուրջ որոշումներ կայացվել, այդ իսկ պատճառով նախագահը հրամայեց մեր զորքերին դուրս գալ տարածաշրջանից»,- պարզաբանել է նա։
Դմիտրի Պեսկովը ևս մեկ անգամ հերքել է, որ ռուս զինվորականները կարող են ներգրավված լինել Բուչայում քաղաքացիական անձանց սպանության մեջ՝ նշելով, որ ուկրաինական և արտասահմանյան լրատվամիջոցների տարածած տեղեկությունները կեղծիք են։
Պեսկովն ընդգծել է՝ հատուկ ռազմական գործողության շուտափույթ ավարտը, ինչպես նաև Ռուսաստանի և Ուկրաինայի միջև համաձայնագրի ստորագրումը բխում է Մոսկվայի շահերից։
Կրեմլի խոսնակը տեղեկացրել է, որ Մոսկվայի և Կիևի միջև բանակցությունները շարունակվում են, նշել՝ Մոսկվան ուկրաինական կողմից ավելի մեծ ակտիվություն է ակնկալում։
ԵՄ-Ն ԿՇԱՐՈՒՆԱԿԻ ԶԵՆՔ ՄԱՏԱԿԱՐԱՐԵԼ ՈՒԿՐԱԻՆԱՅԻՆ
Եվրամիությունը ցանկանում է, որ պատերազմն Ուկրաինայում հնարավորինս շուտ ավարտվի՝ հայտարարել է Ժոզեպ Բորելը։ «ԵՄ-ն պետք է շարունակի Ուկրաինային աջակցությունը՝ նրան զենք մատակարարելով»,- նշել է դիվանագետը, հիշեցրել՝ Միությունն Ուկրաինային արդեն 1 միլիարդ եվրոյի զենք և զինամթերք է տրամադրել։
Ավելի վաղ Բորելը հայտարարել էր, որ Եվրամիությունը չի ցանկանում հակամարտության մեջ մտնել Ռուսաստանի հետ։ «Մենք անում ենք հնարավորը, սակայն առանց կարմիր գծերը հատելու»,- հստակեցրել է պաշտոնյան։
Նա կարծիք է հայտնել, որ Եվրամիությանը չի հաջողվի միասնական արգելք դնել ռուսական գազի ներկրման վրա, քանի որ Հունգարիան հայտարարել է, որ նման առաջարկի դեպքում վետո կկիրառի։
ՌՈՒՍԱԿԱՆ ԳԱԶԻՑ ԿԱԽՎԱԾՈՒԹՅՈՒՆԸ ՊԱՀՊԱՆՎՈՒՄ Է
Հունգարիան դիտարկում է ռուսական գազի մատակարարումների դիմաց ռուբլով վճարման տեխնիկական հնարավորությունները։ Այդ մասին հայտարարել է արտգործնախարար Պետեր Սիյարտոն։
Նա հիշեցրել է, որ բնական գազի մատակարարումները նախատեսված են երկկողմ համաձայնագրով, «ԵՄ-ն այդ պայմանագրի կողմ չէ»՝ շեշտել է Սիյարտոն։
Ավստրիան ներկայումս նույնպես չի կարող նվազեցնել իր կախվածությունը ռուսական գազից։ «Ցավոք, ռուսական գազի բացակայությունը մեզ՝ Եվրոպային, Ավստրիային, ավելի շատ կվնասի, քան Վլադիմիր Պուտինին։ Մենք 80 տոկոսով կախված ենք ռուսական էներգակիրներից»,- ընդգծել է երկրի կլիմայի պաշտպանության, էկոլոգիայի, էներգետիկայի, տրանսպորտի և տեխնոլոգիաների նախարար Լեոնորե Գևեսլերը։
Սերբիայի և Ռուսաստանի նախագահներն էլ հեռախոսազրույցի ընթացքում ընդգծել են գազի մատակարարման վերաբերյալ պայմանագրի շուրջ բանակցությունները շուտափույթ սկսելու անհրաժեշտությունը՝ հաշվի առնելով, որ Մոսկվայի և Բելգրադի միջև համապատասխան համաձայնագրի ժամկետն ավարտվում է մայիսի 31-ին։
Ալեքսանդր Վուչիչը նշել է, որ Սերբիան չի հրաժարվում Եվրամիությանն անդամակցելու հավակնությունից, սակայն ցանկանում է բարեկամական հարաբերություններ պահպանել Ռուսաստանի հետ։
