Ուկրաինական ճգնաժամը չպետք է անդրադառնա այլ երկրների, այդ թվում՝ Ռուսաստանի հետ Չինաստանի բնականոն առևտրային հարաբերությունների վրա։ Այդ մասին հայտարարել է Չինաստանի արտգործնախարարության Եվրոպայի վարչության ղեկավար Վան Լութունը՝ մեկնաբանելով նախօրեին կայացած ԵՄ-ՉԺՀ առցանց գագաթնաժողովի արդյունքները։
«Չինաստանն ուկրաինական ճգնաժամի կողմ չէ։ Մենք չենք կարծում, որ այն պետք է ազդի որևէ այլ երկրի հետ մեր բնականոն առևտրի վրա: Նույնիսկ Եվրոպան կանոնավոր բիզնես է վարում Ռուսաստանի հետ, չի դադարեցրել առևտուրը»,- նշել է դիվանագետը։
Նա հավելել է, որ Չինաստանը միտումնավոր ոչինչ չի անում՝ շրջանցելու ԱՄՆ-ի և Եվրոպայի երկրների կողմից Ռուսաստանի նկատմամբ սահմանված պատժամիջոցները: Վան Լութունը հավելել է, որ Պեկինը դեմ է բոլոր պատժամիջոցներին:
Խոսելով ուկրաինական ճգնաժամի մասին՝ ՉԺՀ ԱԳՆ ներկայացուցիչը տեղեկացրել է, որ Պեկինը Կիևից որևէ հարցում չի ստացել՝ Ուկրաինային անվտանգության երաշխավոր դառնալու վերաբերյալ:
