Կառավարության նիստից հետո տեղի ունեցած ճեպազրույցում ՀՀ ՄԻՊ Քրիստիննե Գրիգորյանը խոսեց Արցախ կատարած իր այցի, այնտեղ կատարած արձանագրումների ու հետևությունների մասին:
Գրիգորյանը նշեց, որ հանդիպումներ է ունեցել Արցախի պաշտոնատար անձանց հետ, այցելել Խրամորթ գյուղ ու շփվել բնակիչների հետ:
«Իմ այցի ժամանակ դեռևս մոտ 2 շաբաթ էր, ինչ Ադրբեջանի զինված ուժերի կողմից սկսվել էր բարձրախոսներով հոգեբանական ճնշում գործադրելու գործընթացը: Խիստ մտահոգիչ էր այն իրավիճակը, որ տեսա այնտեղ: Խոսքը բնակչության հոգեբանական վիճակի մասին է: Այցից հետո ցավալիորեն ունեցանք շատ ավելի լուրջ զարգացումներ, ընդհուպ ինտենսիվ կրակոցներ, մեծ տրամաչափի զենքերից կրակոցներ ու նաև հետագայում գազի անջատման ու էլեկտրաէներգիայի անընդհատ ընդհատումների պայմաններում անտանելի հումանիտար իրավիճակ էր»,- ասաց Գրիգորյանը:
Նա տեղեկացրեց, որ այցելել է նաև Ստեփանակերտում գտնվող տեղահանված բնակիչների ժամանակավոր կացարան:
«Զբաղվածության, սոցիալական ինտեգրման, երեխաների ադապտացման խնդիրները շատ էին»,- ասաց ՄԻՊ-ը:
Խոսելով այցից հետո իր կատարած հետևությունների մասին՝ Գրիգորյանը նշեց, որ Ադրբեջանի կողմից ճնշման, ահաբեկման, հայաթափման նպատակ հետապնդող քաղաքականությունը շարունակական է:
Լրագրողները Մարդու իրավունքների պաշտպանին հարց ուղղեցին Ադրբեջանի հետ խաղաղություն հաստատելու մասին:
«Խաղաղության խոսակցությունները, կամարտահայտման բարձրաձայնումները պիտի ապացուցված լինեն նաև գործողություններով: Առնվազն վերջին 2 շաբաթվա իրադարձությունները և էսկալացիաները, ներառյալ հումանիտար իրավիճակի լարվածությունը ցույց են տալիս, որ խաղաղության մասին խոսակցությունների համար ուղղակի միջավայր ու գործողություններ չկան: Դրանք, մեղմ ասած, ադրբեջանական կողմից անկեղծ չեն»,- ասաց Գրիգորյանը:
