ԱԺ մարդու իրավունքների պաշտպանության և հանրային հարցերի մշտական հանձնաժողովի նիստում քննարկվել է ՀՀ կառավարության 2022 թ. փետրվարի 28-ի «ՀՀ կառավարության ծրագրի (2021-2026 թթ.) 2021 թ. կատարման ընթացքի և արդյունքների զեկույցի մասին» N 234-Ա որոշմամբ հավանության արժանացած զեկույցը:
ՀՀ առողջապահության նախարար Անահիտ Ավանեսյանը նշել է, որ 2021 թ. Կառավարության քաղաքականությունն ուղղված է եղել առողջապահության ոլորտում հասանելի, որակյալ, արդիական առողջապահական ծառայությունների մատուցմանը, վարակիչ և ոչ վարակիչ հիվանդությունների կանխարգելմանը, վաղ հայտանբերմանը, բուժմանն ու դեղորայքի հասանելիությանը:
2021 թ. ծանրաբեռնված է եղել կորոնավիրուսի պատճառով, համակարգն աշխատել է գերծանրաբեռնված՝ մի կողմից սպասարկելով համավարակով հիվանդացածներին, մյուս կողմից՝ այլ հիվանդներին: Պետպատվերի շրջանակում ընդլայնվել է երեխաներին տրամադրվող դեղորայքային փաթեթը: 2021 թ. մի շարք հիվանդությունների գծով պետական բյուջեից կենտրոնացված կարգով ձեռք է բերվել 58 անվանումով դեղ, որը տրամադրվել է 199 000 շահառուի:
2020 թ. համեմատ՝ շուրջ 200 000-ով ավելացել է դեղորայքի անվճար փաթեթից օգտվող շահառուների թիվը: Հաշվետու տարվանից գործել են «Վերարտադրողական առողջության մասին» օրենքի նոր դրույթները, ինչը քաղաքացիներին օրենքի տված լիազորություններից օգտվելու ավելի մեծ հնարավորություններ է տվել:
Նախարարն անդրադարձել է հիվանդությունների վաղ հայտնաբերման հարցում իրականացվող քայլերին:
Նշվել է, որ շարունակվում են կապիտալ ներդրումների մասով աշխատանքները. մի շարք մարզային հիվանդանոցներում հիմնանորոգման աշխատանքներ են տարվում:
Մարդու իրավունքների պաշտպանության տեսանկյունից Անահիտ Ավանեսյանը կարևորել է համապարփակ էլեկտրոնային համակարգի զարգացումը և հասանելիությունը քաղաքացիների համար: 2021թ. գործարկվել է ծնունդների և մահվան գրանցումների ավտոմատացված համակարգը:
Հանձնաժողովի նախագահ Թագուհի Թովմասյանը հետաքրքրվել է տարբեր լաբորատորիաներում COVID-19-ի համար նախատեսված թեստերի գնային տատանումներով, Վարդենիսի հիվանդանոցի վերանորոգմամբ՝ նշելով, որ վիճակը մտահոգիչ է:
Անահիտ Ավանեսյանի գնահատմամբ՝ ՊՇՌ թեստերի արժեքը պետք է դիտարկել ժամանակի ընթացքում, քանի որ գները կտրուկ փոխվել են: Նախարարի խոսքով՝ ներմուծման տարբեր գներ կան, գինը ձևավորվում է ոչ միայն թեստի արժեքը, այլ նաև լաբորատոր սարքավորումների, բուժաշխատողների համար անհրաժեշտ ֆինանսական հատկացումները հաշվի առնելով:
Նախարարը տեղեկացրել է, որ Կառավարության ծրագրով` մինչև 2026թ. պետք է վերակառուցվի ու վերազինվի առնվազն 50 բժշկական կենտրոն: Վարդենիսի հիվանդանոցն այդ ցանկում է և առաջիկայում, ըստ առաջնահերթության, ընդգրկվելու է պետական կապիտալ ծախսերի բյուջետավորման մեջ: Անահիտ Ավանեսյանի խոսքով՝ Վարդենիսի հիվանդանոցում ևս իրականացվել են ներդրումներ, ինչն օգնել է բարելավել բժշկական ծառայությունների որակը:
