Արցախցի դպրոցականները ծննդավայրը թողնելու նպատակ չունեն։ Որոշել են մնալ ու զարգացնել իրենց բնակավայրը, դարձնել տեխնոլոգիական կենտրոն։ Այդ նպատակով Մարտունու շրջանում կհիմնվի «Մունք» տեխնոդպրոցը։
«Ես» կրթական հիմնադրամի շնորհիվ երեխաները ստանում են մասնագիտական կողմնորոշում։ «Մունք» ծրագրի երկրորդ՝ հմտացման փուլն է։ Դպրոցը տալու է ժամանակակից տեխնոկրթություն։
Աշոտ Ավանեսյան («Ես» կրթական հիմնադրամի տնօրեն) - Յուրաքանչյուր շահառու՝ կրթական գործընթացը հաջողությամբ ապահոված, կդառնա տվյալ ոլորտի սկսնակ մասնագետ՝ պահանջված ու մրցունակ մասնագետ, ոչ միայն Արցախում, այլ նաև ամբողջ աշխարհում։
Դպրոցը օգնելու է, որ ստեղծվեն աշխատատեղեր, մեծանա ապագայի նկատմամբ հավատը։
Աշոտ Ավանեսյան - Մեծ նպատակը՝ այսօրվա աշակերտներին ու վաղվա երիտասարդներին հնարավորություն տալ տեղում որակյալ գիտելիք ստանալ։ Բերել աշխարհի հնարավորությունները այնտեղ, որպեսզի իրենք չգնան այդ հնարավորությունների հետևից։
Նախագծի նպատակը Արցախում առկա շատ խնդիրներին լուծում տալն է։ Այն իրականացվում է փուլերով։ Ձեռք են բերվելու անհրաժեշտ սարքավորումներ, համակարգիչներ, հավաքագրվելու են մասնագետներ։ Արցախի տեխնոապագան ստեղծելու համար համախմբվել են շատ անհատներ, կազմակերպություններ, որոնք ոչ միայն նյութապես կաջակցեն։ Նրանց միավորող «ՌեԱրմենիա» հարթակից նշում են, որ նվիրաբերողները 500-ից ավելի են։
Արտակ Գրիգորյան (reArmenia կազմակերպության գործառնական տնօրեն) - Եթե տեղում կազմակերպվի համապատասխան կենտրոն, տեխնոկրթություն, ապա հավանականությունը, որ երեխաները, երիտասարդները կլքեն իրենց բնակավայրերը, փոքր է լինում։ Այդ առումով տեխնոդպրոցը կարևորվում է։ Այս պահին ունենք հավաքված մոտ 32 միլիոն դրամ, ինչը կազմում է գումարի 46 տոկոսը։ Արշավը շատ ակտիվ շարունակվում է։
Նվիրատվության համար անհրաժեշտ է մուտք գործել «ռեԱրմենիայի» կայք։ Գումարը հավաքելուն զուգահեռ՝ աշխատանքները սկսվել են։
Արտակ Գրիգորյան - Նույնիսկ Արցախի Մարտունու շրջանի երեխաներն են միացել դրամահավաքին՝ իրենց փոքր լուման ունենալով։ Հիմա ժամանակն է, որ միավորվենք ու ունենանք հերթական հաջողության պատմությունը։
Կազմակերպիչները վստահ են՝ «Մունք»-ը լինելու է թիմային աշխատանքի արդյունք։ Միասին կարող են։
Հեղինակ՝ Անի Ավագյան
