«Արմենպրես» լրատվական գործակալությունը ամփոփել է «Երևանյան բեսթսելլեր» հատուկ նախագծի 2021 թվականի արդյունքները, խրախուսել լավագույններին: Կայքը մոտ 10 տարի ամեն շաբաթ ամփոփում է գրահրատարակչության ոլորտը, վերլուծում վաճառքի ցուցանիշներն ու ներկայացնում հայ հրատարակիչների տասը լավագույն գրքերը:
Նարինե Նազարյան («Արմենպրես» լրատվական գործակալության տնօրենի պաշտոնակատար) - Հանձնվել է 9 մրցանակ: Երևանյան բեսթսելլեր հատուկ նախագծի գլխավոր նպատակը գրքի նկատմամբ սիրո ամրապնդումն է, գրքի հանրահռչակումը, հայ հեղինակներին խրախուսումը:
«Տարվա հայ հեղինակ» անվանակարգում հաղթողը երիտասարդ գրող Սյունե Սևադան է: Նրա «Կախվածություն» պատմվածքների ժողովածուն ունեցել է մի քանի հրատարակություն, վաճառվել հազարավոր օրինակներ:
Սյունե Սևադա (գրող) - Իսկապես, շատ սիրով եմ գրել բոլոր պատմվածքները, որոնք ներառված են «Կախվածություն» ժողովածուի մեջ: Եվ, իհարկե, այս մրցանակը չէր լինի առանց ընթերցողների, որովհետև սա նրանց շնորհիվ է, ինչի համար շատ ուրախ եմ: Նաև պարտավորեցնող է:
Ամենապահանջված գրքերի թարգմանիչը Նարինե Գիժլարյանն է: Նրան մրցանակը շնորհվում է արձակագիր Նարինե Աբգարյանի ստեղծագործությունները թարգմանելու համար: Հեղինակի «Մանյունյա» եռագրությունը ևս ունեցել է մի քանի հրատարակություն, առաջին երկուսն արդեն թարգմանել է, երրորդ գրքի վրա դեռ աշխատում է: «Զուլալի» վեպի հիման վրա նաև ֆիլմ է նկարահանվել:
Նարինե Գիժլարյան (թարգմանիչ) - Իրոք, իմ բախտը բերեց, երբ ինձ առաջարկեցին էդ ստեղծագործությունները թարգմանել, որոնք ժամանակին ինքս հավանել եմ: Բարձր եմ գնահատում այս մրցանակը, ինձ համար, կարելի է ասել, թանկ մրցանակ է, որովհետև, իրոք, իմ աշխատանքի գնահատականն է ամփոփված այստեղ, ընթերցողի պահանջարկը վայելող գրքեր են:
«Լևոն Անանյանի» անվան գրական մրցանակը շնորհվեց երիտասարդ գրող Լևոն Նեսին: Նրա «Բալզակ, մի շան պատմություն» վիպակը նույնպես մեծ հաջողություն է ունեցել, վերահրատարակվել մի քանի անգամ: «Ստախոսը» վիպակը նույնպես լավագույնների շարքում է:
Լևոն Նես (գրող) - Կարծում եմ՝ մանկապատանեկան ստեղծագործությունները հարաբերականորեն քիչ են, ու իմ ստեղծագործությունն այն էր, ինչ կարծում եմ՝ շատերն ուզում էին: Եվ սա շատ է ոգեշնչում նոր ստեղծագործություններ գրելու, որ զգում ես, որ դու գնահատված ես:
Հատուկ մրցանակներ հանձնվեցին նաև որոշ հրատարակչությունների՝ մանկապատանեկան գրքերի, սփյուռքահայ գրականության, ինչպես նաև երիտասարդ հայ գրողների ստեղծագործությունները տարվա ընթացքում պարբերաբար հրատարակելու համար:
