Արցախի Հանրապետության արտաքին գործերի նախարար Դավիթ Բաբայանը փետրվարի 19-ին Երևանի պետական համալսարանի պատմության ֆակուլտետի պատմություն և կովկասագիտություն ամբիոնների ուսանողների համար հանդես է եկել դասախոսությամբ:
Նախարարն անդրադարձել է ադրբեջանա-ղարաբաղյան հակամարտության կարգավորմանը, տարածաշրջանային զարգացումներին, Արցախի արտաքին քաղաքականությանը և պետականաշինության գործընթացին, ներհայկական կապերին, տարբեր այլ հարցերի:
Արցախի արտաքին գերատեսչության ղեկավարը հրամայական է համարել պատերազմից հետո ինքնակազմակերպվելու և առկա ու ապագա մարտահրավերներին համախմբված դիմագրավելու անհրաժեշտությունը՝ առանձնացնելով հատկապես գիտական ներուժի դերակատարությունը՝ պետության ռազմավարական ոլորտներում նվաճումներ արձանագրելու և պետականության կենսունակությունը ապահովելու գործում:
Դավիթ Բաբայանը կարևորել է Հայաստանի ու Արցախի միջև գիտական փոխգործակցության ակտիվացումը՝ ընդգծելով արցախագիտության զարգացման անհրաժեշտությունը Հայաստանի առաջատար բուհերում:
Արցախի ԱԳ նախարարը պատասխանել է ուսանողների հարցերին և տվել պարզաբանումներ:
Հանդիպմանը մասնակցել են ՀՀ-ում Արցախի մշտական ներկայացուցիչ Սերգեյ Ղազարյանը, պաշտոնատար այլ անձինք։
![May be an image of 18 people, people standing and outdoors](https://scontent.fevn2-1.fna.fbcdn.net/v/t39.30808-6/274115563_313495410813248_103936815953840070_n.jpg?_nc_cat=109&ccb=1-5&_nc_sid=730e14&_nc_ohc=vFdPm_ffHuMAX_m0H6Q&_nc_ht=scontent.fevn2-1.fna&oh=00_AT-3GyhiVTAxohGk_qGStrzmGv09tax6VjRZY3ohvWccBg&oe=6214CFC6)